Ujajaasut kiinarpallit taxartartoq sioorasaaraat

Angutit marluk kiinarpallik taxartitsisoq savimmik sioorasaarlugu 4.000 koruuninik pissarsiffigaat. Sisimiuni politiit taama ilisimatitsipput.

Ujajaaneq ullumi nalunaaqutaq qulingiluanut pivoq.

Angutit taakku marluk Qeeqini blok 11-p eqqaani biilit unittarfianni uninnganerani taxamut ornigupput. Ilaasut ikisarfiatigut matu ammarpaat, aappaa savimmik angisuumik sioorasaarivoq.

Pinerluuteqartut marluusut aappaa oqarpoq: "Aningaasivik tunniunnianngikkukku kapissavakkit'', nangillunilu ''imaluunniit qaqerluissavakkit".

Taxartitsisoq sioorasaarlugu aningaasivianik tunniussitippaat, taanna 4.000 krouuninik imaqarpoq.

Pinerluuteqartut marluk pisuttarfikkut Tuapannguit tungaanut qimaapput.

Politiit nalunaaqutaq 9:43 nalunaarfigineqarput.

Pinerluuteqartup aappaa ima isikkoqarnerarneqarpoq:

• 180 cm missaanik angissusilik
• Tuattoq
• Taartunik atisalik qernertumik annoraaminermik kiinarpalik
• Qorsunnik annoraassiassanik aaqqatilik

Aappaa ima isikkoqarnerarneqarpoq:

• 170 cm missaanik angissusilik
• Nalinginnarmik isikkulik
• Taartunik atisalik annoraassiassamik qernertumik kiinarpalik

Politiit takunnittunik, pinerluuteqartut taakku Qeeqinit Tuapannguanut aqqummi takunnissimasinnaasunik, imaluunniit ujajaanermut ilisimasaqarsinnaasunik ujaasipput.

Paasissutissat Sisimiuni politiinut 70 13 22-mut tunniunneqarsinnaapput.