eftersøgning
Ujaasisut: Suli neriuppugut
Arfininngormat sapaatit akunneri pingasut qaangiupput Nick Duus Nielsen Narsamit umiatsiamik aallartoq takuneqarmat. Ujaasisut suli neriuutigaat nassaariumaarlugu. Arlaanni
– Siusinnerusukkut tusarneqartarsimavoq inuit suuteqaratik pinngortitami qaammatini marlussunni annassinnaasut. Tamanna Nick Duus Nielsenimut neriuutigaarput. Neriuppugut ullut arlaanni puttutissasoq.
Taamatut oqaluttuarpoq Nick Duus Nielsenip ukuaa Abrocia Hansen, taassumalu Facebook-imi pilersissimavaa Nick Duus Hansenip Ujarneqarneranut Katersuiniarneq.
– Aasaavormi, upperaarpullu Nickip nassaarinissaanut periarfissaqarluartoq. Tupinnartuuvormi angallataa sumilluunniit malussarfigineqarsimanngimmat. Upperaarput sumi arlaanniittoq. Nickilu tammarmalli ullut tamarluinnaasa angallatit marluulluta ujartarparput, Abrocia Hansen oqarpoq.
Inuit Paamiut angullugit sineriassiorsimapput sunut tamanut ujaasisarlutik, aammalu kangerluit illuaqqallu 33-it alakkartarneqarsimapput, Nick Duus Nielsen tamakkua arlaanniissasoralugu.
– Politiit ujaasineq unitsissimavaat, suna pissutigalugu ujaasinersi ingerlatiinnarpisiuk?
– Nassaarinissaa neriuutigeqigatsigu. Tamassumami ingerlappaatigut. Aamma tammarneranit sapaatit akunneri pingasut qaangiutereersimagaluartut. Arlaanniippoq, Abrocia Hansen oqaerpoq.
Aamma atuaruk: Piumassutsiminnik sulisut Nick Duus Nielsenip Ujarneqarneranut katersuiniarput
Nick Duus Nielsen juulip 20-anni, arfininngornermi ullaakkut, tammarpoq Narsap umiarsualivianit aallarami. Festertuniissimavoq assortuutileriaramikku qimagussimalluni. Sukkasuuliamik ´Yamarin C 59´-imik meqqilimmik, 18-20 fodit missaannik angissusilimmik, ammasumik initalimmik angallateqarpoq. Angallat 115 hk-nik sakkortussusilimmik motooreqarpoq, meqqia ilisimaneqanngitsoq. Angallat ilisarnaateqanngilaq, ujaasissutaali saamerleq amigaataavoq.