Friday, October 27, 2017 - 11:14

Ujaasineq kinguneqarpoq, alianartumilli paasisaqartoqarluni

Qalipakkamik qalipaasimasumik ujaasineq nassaarfiuvoq, qalipagarlu maanna atuagassiap ''Grønlandsk kultur- og samfundsforskning 2015-17”-ip saqqaani takuneqarsinnaavoq.

Ujarneqartoq pillugu alianartumik pisoqarsimasoq tassani paasineqarpoq, professor Jette Rygaard Ilisimatusarfimmeersoq Sermitsiaq.AG-mut oqarpoq.

Aamma atuaruk: Ujaarisitsineq: Kina assimik eqqumiitsuliortuua?

Taanna upernaaq Sermitsiaq.AG-mut saaffiginnippoq, Ilisimatusarfiup atorusutaanik qalipakkap qalipaasuanik aaqqissuisoqarfik ujartueqqullugu saaffiginnippoq.

- Eqqumiitsuliortup qatanngutaata angutip ujaasineq takuaa, kingornalu qatanngutaanit arnaanillu saaffigineqarpugut, Jette Rygaard oqaluttuarpoq, taassuma nuannaarutigalugu saqqummiuppaa, tassani Fritz Petersen - Fritti (1987-2016) pineqarpoq.

Inuusuttoq piginnaasalik
- Inuusuttoq eqqumiitsuliortoq piginnaasalerujussuaq tassani pineqarpoq, taanna inuusulluni alianartumik qimaguppoq, Jette Rygaard oqaluttuarpoq, ilisimatitsissutigaalu Eqqumiitsuliornermik Ilinniarfimmi ilinniartuusimasoq.

- Arnaanit Hansine Petersenimi assilialiaata ''Grønlandsk Kultur og Samfunds Forskning 2015-17''-ip saqqaani atornissaanut akuerineqarpugut. Aaqqissuisoqarfimmi aamma arnaalu angusaq pillugu tulluusimaartorujussuuvugut. Naak ernermik maqaasineq peerneqarsinnaanngikkaluartoq, Hansine ernermi qalipagaa nersorneqarmat qanoq nuannaartiginerluni tulluusimaatiginerlunilu oqaluttuaraa, professori oqarpoq.

Ilassinninneq - kikkut tamarmik tikilluaqqusaasut
Atuagassiaq nutaaq ullumi nalunaaqutaq 15.00-16.00 Ilimmarfimmi saqqummiunneqassaaq, kikkut tamarmik tikilluaqqusaapput.

Assi.: Ilimmarfik
Assi.: Ilimmarfik
Seneste nyheder / Nutaarsiassat kingulliit