ujaasineq unitsinneqarpoq

Ujaarineqartut ajunaarsimanissaat ilimagineqartoq

Annertuumik ujaasineq ingerlanneqarsimangaluartoq, Kujataani Saarluminngaanneersut politiinit Issittumilu Sakkutooqarfimmiit toraarneqarsimanngillat

Annertuumik ujaasineq ingerlanneqarsimangaluartoq, Kujataani Saarluminngaanneersut politiinit Issittumilu Sakkutooqarfimmiit toraarneqarsimanngillat

Politiit Issittumi Sakkutooqarfik suleqatigalugu arfininngornermi Bell 212 atorlugu ujaasisimapput. Taamatullu Danish Air Force timmisartuat Challenger atorlugu, Qaqortup Ammassiviarsuullu sineriaa kujammullu Nanortallip tungaanut ujaasiffigineqarput imartatta ammaannartup tungaa ilanngullugu.

Ujaasineq sapaammi nangeqqinneqarpoq Bell 212 atorlugu aammalu Targa ataasinngornermi Illersornissamut Lynx peqatigalugu kiisalu Challenger.

Annertuumiilli ujaasineq ingerlanneqarsimangaluartoq, Saarluminngaanneersut toraarneqarsimanngillat.

Atuaruk: Angallammik inunnik marlunnik ilaasulimmik ujaasineq

Ajunaarsimanerat ilimagineqartoq

Aammattaaq Narlunaq/Tunulliarfik annertuumik avannaatungaaniit Nanortallip kujataatungaa ilanngullugu ujaasiffigineqaraluarpoq aammalu Nunarsuit kitaatungaanni imarpiup tungaanut, arlaannilluunnit maqaasineqartut umiatsiap umiiarnikuinik nassaarfigineqarani, politiit Facebookiminni paasissutissiipput.

- Isorartuumik qulimiguulimmik aammalu ilaatigut imaatigut ujaasisoqaraluarpoq arlaannik nassaarfigineqaratik, tamannalu tunngavigalugu ujaarineqartut ajunaarsimanissaat ilimagineqarluni, taamaalilluni Kujataani politiit ullormiit aaliangerput ujaasineq unitsinneqassasoq, politiit nalunaaruteqarput.

Pineqartut angallammik 16 fods-mik With 400-mik, sungaartumik qalipaatilimmik, tungujortumilllu qalipaatilinnik sinaakkutitalimmik aammalu issivittalimmik, aammattaaq qernertumik qalipaatilimmik 40 hk Mercury-mik aquuteralalimmik aallarsimanerangaapput. Politiilli paasissutissiaraat angallammi VHF-eqanngitsoq.

Powered by Labrador CMS