Friday, April 21, 2017 - 06:46

Tyskit umiarsuaataasa ikummatissat Nunatsinnut assartortalissavaat

Polaroil ukiuni tallimani atuuttussamik tyskit umiarsuaatileqatigiiffiat German Tanker Shipping-imut isumaqatigiissusiorpoq, ikummatissanik Nunatsinnut assartuisalissapput
Assi.: Polaroil
Polaroil ukiuni tallimani atuuttussamik tyskit umiarsuaatileqatigiiffiat German Tanker Shipping-imut isumaqatigiissusiorpoq, ikummatissanik Nunatsinnut assartuisalissapput

Ukiuni tulliuttuni tallimani German Tanker Shippingip umiarsuaataasa marluk, ikummatissat Nunatsinnut assartortalissavaat.

Polaroilimi ukiuni tulliuttuni tallimani tyskit umiarsuaatileqatigiiffiannik gasuuliamik, petroleumimik, timmisartup orsussaanik Jet A1 benzinamillu assartuisalernissaannik isumaqatigiissuteqarfigaat.

- Ikummatissamik avataaniit tikisitsisarnissami apriilimiit decembarimut ukiumut tallimariarluni assartuinermi tikisinneqartartussaavoq 40.000 kubikmeter, Polaroil tusagassiuutinut nalunaarummini allappoq.

Ikummatissaq assartorneqartussaq suli Gøteborg-imi akuiaavimmiit Preem-imiit usilersuunneqartassaaq, taamaalilluni Polaroil-ip ikummatissamik avataaniit tikisitaa Kangerluarsorutsimi, Nuummi Sisimiunilu ikummatissaasivinnut usingiarneqartassaaq, kiisalu ukiumut ataasiarluni Kangerlussuarmut ikummatissamik pajuttassallutik.

Siullermeerlutik Nunatsinnut assartuinerminni Nuummi Polaroil ulloq 19. april pajuffigaat.

Umiarsuit German Tanker Shipping-ip assartuitinniagai ateqarput M.T. 'Seacod' aamma M.T. 'Seamarlin'.

Seneste nyheder / Nutaarsiassat kingulliit