Tv signal nutaaq KNR-p nuannaarutigaa
Siunissami KNR-imi taamaallaat nammineq aallakaatitassiat, suleqateqarluni aallakaatitassiat aallakaatitassiallu nutserneqarsimasut takutinneqartassapput, KNR-p pisortaa Ivalo Egede neriorsuivoq
KNR-imi nuannaarutigineqarpoq tv digitaliusoq (DVB-T-mik taaneqartartoq atorneqalissammat, tamannalu nunatsinni tamarmi isiginnaartartunit amerlanerujartortunit atorneqalissaaq, KNR-p pisortaa Ivalo Egede oqarpoq.
– Isiginnaartartuvut DVB-T-mik takusaqarsinnaalernertik ilutigalugu pitsaannguutit arlaqartut takutinnaassavaat. Assitai pitsaanerulissapput, ersarinnerullutik. Aamma kiisami tv-mi aallakaatitsineq silittumik taaneqartartoq16:9 takuneqarsinnaalissaaq, KNR-p pisortaa oqarpoq.
– Tele Greenlandip 2012-p naalernerani analogimik aallakaatitsineq qamippagu innuttaasut tamarmik kanalinik arlalinnik toqqagassaqalissapput, taamaalilluni KNR-imi aallakaatitsineq allanngorujussuassalluni, taamaalaallu nammineerluni aallakaatitassiat, suleqateqarluni aallakaatitassiat aallakaatitassiallu nutaserneqarsimasut KNR-imi aallakaatinneqartassallutik, Ivalo Egede neriorsuivoq nangillunili aallakaatitassit amerlassusaat soorunami nukissaqarneq aallaavigalugu suliarineqartassasut.
– Taamanikkussamut KNR-imi aamma kanali alla sillimmatitut atorneqalissaaq, soorlu Inatsisartut ataatsimiinneranni toqqaannartumik aallakaatitsisoqarluni, imaluunniit arsaalluni pissartanngorniuttoqartillugu, Ivalo Egede oqaluttuarpoq.
Tassani apeqqutaassaaq isiginnaartartut isiginnaarutimikkut takunnissinnaassanersut. KNR-imi kanalit digitalit takusinnaassagaanni MPG4-mik tigusissuteqartariaqarpoq.