Nanoq Media
TV-qarfik pingsunik soraarsitsilluni aallakaatitassiaq atorunnaarpaa
TV-eqarfimmi isiginnaagassiisartumi namminersortumi, Nanoq Mediami ilaasortat ikiliartorput. Sipaarniarnerit pissutigalugit tusagassiorfiup sulisut pingasut soraarsippai, ullormullu nutaarsiassanik aalakaatitsisoqartarunnaassaaq.
- Nanoq Newsip nutaarsiassanik aallakaatitsisarnini allanngortilerpaa. Ullormut nutaarsiassanik aallakaatitsisarneq ullumi tallimanngornermi naggataassaaq.
TV-eqarfik isiginnaagassiisartoq namminersortoq, Nanoq Media, Nuummi allaffeqarfeqartoq taama tusagassiuutinut nalunaaruteqarpoq.
Sulisunik pingasunik soraarsitsisoq
Nanoq Mediap sipaarniuteqartariaqalernera aalajangiinermut tunuliaqutaavoq.
- Nuummi imaatigut kabelip atulerneqarneranit ilaasortat 20 procentit missaanniittut annaavagut. Imaatigut kabeli maanna avannamut ilaneqarpoq, tassanilu aamma ilaasortat amerlanerusut annaanissaat naatsorsuutigaarput. Taamaattumillu sipaarniuteqartariaqarpugut, Nanoq Mediami pisortaq, Bjørn Holm, Sermitsiaq.AG-mut taama oqarpoq.
Sipaarniarneq pissutigalugu sulisut pingasut soraarsinneqarsimasut taanna ilisimatitsivoq.
Aallakaatitaq nutaaq
- Soorunami internetip ineriartortinneqarnera nuannaarutigaarput. Ineriartorneq nunarsuaq tamakkerlugu takuneqarsinnaavoq. Internetip inuit isiginnaarutikkut isiginnaartarnerat allanngortittussaavaa. Ineriartortorneq taamaappoq, tamanna uagut allanngortissinnaanngilarput, Bjørn Holm oqarpoq.
Novembari allartilaarpat nutaatut aallakaatinneqartalissaaq ”Nutaarsiassat tunulequtaat”, aallakaatitani itisiliisoqartassaaq, inuiaqatigiinni pisut soqutiginartut aallaavigalugit.
- Taamaasilluta neriuppugut, nunatsinni amigaatigeqisatta ilaat, tassa nutaarsiassanik itisiliisarneq, piviusunngortissallugu, Nanoq Media ilisimatitsivoq, tamatuma saniatigut nalunaarutigaa ”Nutaarsiassat Tunulequtaat” qallunaatut aallakaatinneqartassanngitsoq.