peqatigiiffik nutaaq
TV-qarfiit peqatigiiffiliulerput
Illoqarfiit tv-qarnerannut radioqarnerannullu aningaasanut inatsimmi 1,9 millioner koruuninik illuartitsisoqartarpoq. Peqatigiiffialli STTK ukiuni marlunni kingullerni naatsorsuutinik kukkunersiukkanik saqqummiussisimanngilaq. Taamaammat nutaamik peqatigiiffiliortoqarnialerpoq
Nuuk TV aamma Arctic TV Ilulissaniittoq suleqatigiillutik tv-qarfiit peqatigiiffittaassaannik pilersitsinialerput. Tamanna pisussanngorpoq maanna peqatigiffiusoq STTK arlaleriarlugu aallarteqqeriarneqareersoq.
Pilersitsilluni ataatsimeersuarnissamut aggustip 29-at aggersaasoqarpoq tamannalu oqarasuaatikkut ataatsimiinnikkut pissaaq.
- Peqatigiiffipput amigaatigisimavarput Nuuk TV-milu siulersuisut siulerisatta peqatigiiffik uummarsariartarsimagaluarpaat. Kisianni tassa ukiut marluk kingulliit naatsorsuutit kukkunersiukkat saqqummiunneqarsimanngillat. Taamaattumik Arctic TV peqatigalugu aalajangerpugut peqatigiiffimmik nutaamik aallartitsiniarluta, Nuuk TV-mi siulersuisut siulittaasuat Peter Frederik Lyberth Sermitsiaq.AG-mut oqarpoq.
Soormi peqatigiiffik pioreersoq uummarissaannanngila?
- Naluarput tupannarsinnaasunik naatsorsuutini nassaassaqarnersoq ukiuni marlunni naatsorsuunik saqqummiussisoqarnikuunngimmat. Aamma taaneqareersutut peqatigiiffik uummarsariarneqartarsimavoq. Peqatigiiffipput amigaatigisimavarput Namminersorlutik Oqartussanut attaveqarnermut. Tassami illoqarfiit tv-qarnerannut radioqarnerannullu aningaasanut inatsimmi 1,9 millioner koruuninik illuartitsisoqartarpoq tamannalu pisussaaffiliivoq qanittumik attaveqarnissamut, Peter Frederik Lyberth oqarpoq, ilanngullugulu oqaatigaa peqatigiffik arlallit pilersitsilluni ataatsimeersuarnissamut peqataaniarlutik nalunaareersimasut.