Tv-mi akerleriinneq: Nunatsinni partiit annersaasa marluk uran suli avissaartuussutigaat
Siumup VVM-ip allaqqitassiaq utaqqimaarpaa, Naalakkersuisut taamaalillutik uranitalimmik atuinissamut akuersissummik tunniussisinnaaniassammata, Inuit Ataqatigiit uranitaqanngitsumik Kujataani ineriartortitsinissamik kissaateqarput.
Qinersinissamut Naalakkersuisunut siulittaasunngortussatut qinigassanngortittut sallersaasa, Kim Kielsenip Siumumeersup aamma Sara Olvsigip Inuit Ataqatigiinneersup, KNR-TV-mi akerleriillutik oqallinnerminni ilaatigut Kujtaani kommunimi suliffissaaleqineq annertooq oqaluuseraat.
Kujataani aalisarneq appasinnerpaaffimminiippoq. Saarullik sinerisamit ungasippoq, angallatiniillu angisuunit kisimi aalisarneqarsinnaalluni. Kujataanilu kommunimi 6.800-nik innuttaasoqartumik suliffissaaleqineq qaffasissorujussuuvoq. Tassanimi inuit 500-t missaanniittut suliffeqanngillat.
Kommunip borgmesteria, Siumumeersoq Kiista P. Isaksen, arlaleriarluni Naalakkersuisunut oqarataaruteqarteqartarpoq, Kujataani aatsitassarsiorfinnik aallartittoqarniassamat.
Kujataani aatsitassanik piiaanermut piumasaqaatit sakkukillineqartariaqarnerinik, kingullermik apriilip aallartinnerani Inatsisartunngortussanut aamma Naalakkersuisunngortussanut kaammattuuteqarpoq.
- Suliniut Tanbreez ukiuni tallimani nikeriarsinnaanngitsutut utaqqisitaavoq, taamatuttaarlu suliniut Kuannersuarnut tunngasoq qinnuteqaatip tunniunneqarneraniit pisortanit suliarineqarnerata sivisussusaata ullut 1300-it maanna qaangersimalereerpaat, taanna allappoq.
Kim Kielsen: Inatsit malipparput
Kujataani pissutsit qanoq sivisutigisumik inooqataaffigiinnarsinnaaneraat qinigassanngortittunut siuttunut apeqqummi, Kim Kielsen akivoq:
- Aatsitassarsiornikkut ukiorpassuarni misissueqqaartoqartarnikuuvoq.Aatsitassat nunami inuussutissarsiornikkut sukarsuit sisamat ilagissagaat, partiit tamarmik isumaqatigiissutigaat. Urani kisimi aporfiuvoq. Siumumit taamaammat erseqqissumik oqaatiginiarparput, uranimik piiaanianngilagut. Aatsitassat qaqutigoortut piiarniarpagut, ineriartornitsinnilu atorluarlugit, Kim Kielsen oqarpoq.
Inuit Ataqatigiit partiip aatsitassanut naalakkersuisuutitaqarneranni akuersissutinik amerlasuunik akuersisimanertik, Inuit Ataqatigiit siulittaasauta Sara Olsvigip kingorna tikkuarpaa.
- Nunaqavissut amerlasuut akuersissutinip pissarsipput. Suliniuterpassuit piviusorsiortut, nunap karsianut iluanaarutaasinnaasut aallartinneqarput. Uranimik piiaanngikkaluarluta, suleqatigiinnerput ineriartortitsinermut pilersitseqataasimasoq tamatuma takutippaa, Sara Olsvig oqarpoq.