Tv-mi akerleriinneq: Kielsen naalakkersuisumik soraarsitsinissamut piareersimasoq
Siumup siulittaasua Kim Kielsen, Naalakkersuisuni siulittaasunngoqqissaguni, naalakkersuisup suliani naammassisinnaanngippagit, soraarsitsinissamut piareersimalluni oqarpoq. Taassuma aamma Sara Olsvigip KNR-TV-mi sapaammi akerleriillutik oqallinneranni tamanna saqqummerpoq.
Partiit siulittaasuisa Sara Olsvigip, Inuit Ataqatigiit, aamma Kim Kielsenip, Siumut, akornanni akerleriilluni sapaammi unnukkut KNR-TV-mi oqallinnermi, Kim Kielsenip siulittaasunngoqqissaguni naalakkersuisup suliassani naammassinngippagit, soraarsitseqqinnissamut piareersimalluni oqaatigaa.
Inuit Ataqatigiit naalakkersuisoqatigiinnik qinigaaffik naallugu atasinnaasunik pilersitsinissamut piareersimalluni qinersisartunut neriorsuinerup kingorna, tamanna Inuit Ataqatigiit siulittaasuannut Sara Olsvigimut akissutitut pivoq.
- Naalakkersuisup suliassani naammassinngippagit, Naalakkersuisut siulittaasuat soraarsitsinissamik aalangernissamut pisussaaffeqarpoq. Naalakkersuisut issiavitsik tigumminiaannarlugu issiasussaanngillat. Tamannami qinigaaffimmi 2009-mit 2013-mut takunikuuarput, Kim Kielsen oqarpoq, nangillunilu:
- Taamaammat naalakkersuisup suliassani naammassisinnaanngippagit tunuarsimaarnianngilanga.