tusagassiuutinik atuineq

Tv-imik atuineq appariangaatsiartoq

Ukiut pingasut ingerlanerini tv-imik atuineq akunnernit 5,3-nit akunnernut 4,5-nut appariarpoq. Radiomi aamma ataasimut atuineq appariaateqarpoq.

Tv-imik radiomillu atuineq appariartorpoq, kisianni KNR attassivoq.

Epinionip tusagassiorfimmut innuttaasunik kiffartuussisumut annertuumik misissuinerani nutaami tamanna atuarneqarsinnaavoq.

KNR-ip inissisimanini attatiinnarpaa
Taakkunani aallakaatitsivinni marlunni ataatsimut atuineq appariaateqaraluartoq, KNR-ip tv-imik aamma radiomik atuisut attatiinnarsimavai, taamaalillunilu nunarsuup sinneranut ineriartornermut sanilliullugu killormoortuanik angusaqarpoq.

Misissuinerup annertuup ukiut tamaasa ingerlanneqartartup, taamaalillunilu Kalaallit Nunaanni tusagassiuutinik atuinerup ineriartorneranik allaatiginnittartup saqqummiuppaa, tv-mik atuineq suli annertusoq. Innuttaasut 88 procentii ullut tamaasa tv-mik isiginnaartarput, radiomut internetimullu kisitsisit 74 aamma 60 procentiupput.

Inuit attaveqaqatigiittarfiini Facebook atorneqarnerpaavoq, ullormut imaluunniit ullut tamangajaasa 61 procentinit atorneqarluni. YouTube 16 procentinit atorneqartarpoq.

KNR-imik naammaginnissimaarneq annertooq
KNR-ip aallakaatittagaanut misissuineq naapertorlugu naammagisimaarinninneq arlalitsigut siuariarfiusimasoq, KNR-imi pisortap Karl Henrik Simonsenip ingammik nuannaarutigalugu oqaatigaa.

- Tulluusimaaqaagut. Misissuinerup takutippaa, tamaviaarluta sulinerput aamma innuttaasunit tigulluarneqartoq, suliagut aammalu maanna taamatut ineriartornerput iluatigineqartoq, tamannalu soorunami nuannaarutigaarput, pisortaaneq Karl-Henrik Simonsen, tusagassiuutinut nalunaarummi oqarpoq

Misissuineq tamaat atuaruk

KNR-ip ullormut nalunaaquttap akunnerini pingasuni sisamani nutaanik aallakaatitsisariarluta 2016-imi ullormut nalunaaquttap akunnerini 11-ni nutaanik aallakaatitsisalernermut isumalluutissat amerlinngikkaluarlugit allanngortitsivoq.

Tekst-tv-imik atuiuartut
Danskit tv-eqarfiisa 2016-ip ingerlanerani teks-tv-mik atorunnaarsiortorneranni, Kalaallit Nunaanni suli tamanna atorluarneqartartoq paasinarpoq. Misissuineq naapertorlugu isiginnaartartut 30 procentiisa tekst-tv ullut tamaasa tamangajaasaluunniit atortarpaat, atuisullu illoqarfiit pingaarnersaata avataaneersuunerupput, utoqqaanerusuniillu atorneqarnerusarluni.

Nutaarsiassaqartitsinermik aamma ullutsinnut tunnganerusunik aallakaatitassianik atuisut ujartuinerupput, misissuineq takutitsivoq.

Radiokkut aallakaatitsinernut naammagisimaarinninneq ataatsimut isigalugu qaffasippoq.

Inatsisartut radiokkoortarnissaat pillugu
Inatsisartut siulittaasuata Lars-Emil Johansenip toqqaannartumik radiokkut aallakaatitsinerit KNR-mut uterteqqinnissaat sulissutigaa.

Tusagassiuutinut nalunaarummi pisortaanerup naammagisimaarinninnermut kisitsisit pillugu tamanna pillugu oqaaseqarfigaa.

- Isumaqarpugut tamassuma takutikkaa, aallakaatitsisarnitta allanngortinnissaannik toqqaanerput assersuutigalugulu Inatsisartut ataatsimiittarnerinik aallakaatitsisarunnaarluta, toqqaannartumik nutaaliaasunik pitsaassusilinnik taarsiinerput iluatsilluartuusoq., pisortaaneq Karl-Henrik Simonsen oqarpoq.

Powered by Labrador CMS