Tuusi Kimmimut Hansimullu: Tunuaritsi!
IA-p utoqqartaa Josef Tuusi Motzfeldt isumaqarpoq ulluni kingullerni Kim Kielsenip aamma Hans Enoksenip iliuusaat torinngilluinnartuusut
Josef Tuusi Motzfeldt Naalakkersuisut siulittaasuannut aamma Inatsisartuni siulittaasumut piumasaqaateqarpoq. Siuttutut kukkuluttorsimanertik nassuerutigisariaqaraat isumaqarpoq. Inuit Ataqatigiit nittartagaanni taama isummersorpoq.
- Piffissanngorpoq maannamut Inatsisartut Siulittaasuata aamma Naalakkersuisut Siulittaasuata ammasumik siuttutut naleqqutinnginnamik nassuernissaannut. Siuttutut inuuttoornerat inuiaqatigiinnut sunniusimavoq. Sapiissuseqarluni eqqortumik aalajangernissaq tassaasariaqarpoq inuuttoorneq nassuerutigalugu nammineerluni tunuartariaqarnermik aalajangerneq, allappoq.
Inatsisartuni 2009-mit 2013-ip tungaanut siulittaasuusimasutut ullut kingulliit pisut kusaginngilluinnarpai.
- Inatsisartunut Siulittaasuusimasutut taama torinngitsigisumik iliortoqarnera mamiasuutigaara. Atorfiup ataqqisariaqassusaanut taama naleqqutinngitsumik pissusilersorneq qinersisartutut isiginninnitsinnit nikanarnerungaarpoq.
Nammineerluni pilersitaq
Hans Enoksenip partiimi siulittaasutut aamma Inatsisartunut siulittaasutut inissisimanini avissaaqqatissinnaasimanngikkai Josef Tuusi Motzfeldt isumaqarpoq.
- Pissutsinullu namminerminut tunngasunut aaqqiissutigeriallaraa partimi naalakkersuisoqataanerata taamaatiinnarnera taamalu, keermiaasit, nuna inuilu naalakkersuinikkut torinngitsuliorfigalugit. Taama torinngitsuliornermut, nammineq tamakkiisumik pilersitaanut, sanilliullugu eqqaanngitsuugassaanngilaq sooq qaammatit sisamaannaat matuma siornagut naalakkersuisunngortitsiniaqataanermini piffissaq sivisunerusoq sukumiinerusumik atorsimannginneraa pingaartinneraqisami ilungersuutiginissaannut. Partiminimi ilanilu inissisimaffiit qaffasissut isumannaarniapallaannarsimagaattut isumaqarnarmat isumaqatigiissutip qanoq patajaatsiginera immineerlugu.
Hans Enoksenip peqataatinneqarsimannginnerminnik oqariartuuteqarnera Josef Tuusi Motzfeldtimit aamma paasiuminaatsinneqarpoq. Inatsisartuni siulittaasuunini atorlugu Naalakkersuisunut siulittaasumik ataatsimeeqateqarumasimasussaagaluartoq isumaqartoq isumaqarpoq.
Aqutsisinnaassuseqanngitsoq
Politikkikkut inissisimaneq Kim Kielsenip aamma pisooqataaffigaa, Josef Tuusi Motzfeldt oqarpoq.
- Naalakkersuisut siulittaasuata suleqatigiissitsisinnaannginnini siuttutullu piginnaanneqqortoorsuunnginnami ukiut kingulliit tallimat naammattorsuarmik takutittareerpaa. Pisuni kingullerpiani saqummiunneqartut ilaannannguiluunniit ilumoorsimappata allaffimminut toqqorluni piginnaatinneqarsimanermisut uteqattaagaata kisimi allaffimminiikkallarnera akuerineqarsinnaatippaa. Piginnaatinneqarsimaneq siuttuunissamik isumaqarpoq, imaanngitsoq nammineq isummani kisiat eqqortuunerarlugu ingerlatsinissamut piginnaatinneqarneq. Siuttuuneq, pingaartumik naalakkersuinermi, isumaqarpoq ataatsimoortitsisussaanermik avissaartuutsitsiniartutuunngitsoq, allappoq.
Taamaattumik ima oqariartuuteqarpoq:
- Piffissap sivikitsup ingerlanerani aseruinerit annertuut pilersinneqarsinnaapput, neriuppunga siuttuugallartut tunuarniuteqarnermikkut sapiissuseqaramik takutissagaat, taamaaliornermikkut ingerlariaqqittariaqarnerput periarfississavaat.