Sanilit
Tuttut, qanilaarneq aamma pilersaarusiunnginneq pillugit
TV2 Østjyllandimi tusagassiortup Aarhusimi Skejbymi kalaallit sanilimi inussiarnersaarnera pillugu oqaluttuaq ullumi saqqummiuppaa
- Sanilikka Qulu aamma Inaluk inissiamut sanilitsinnut siorna decembarimi nuupput. Aallaqqaammut maluginngilakkut, Thomas Gam Nielsenip TV2 Østjyllandip nittartagaani oqaluttuarnini taama aallarnerpaa.
Taanna allakkatut, assigigut aamma videokkut oqaluttualiaavoq. Inussiarnersaarneq pillugu oqaluttuaq, nammineq pisamik sassaallernermik aamma Danmarkip Nunattalu assigiinngissutaat annikitsut pillugit oqaluttuaq.
- Danmarkimi nereqatigiinnissamut isumaqatigiissutit pilersaarusiorneqartarput. Qulu aamma Inaluk uagutsinnut oqartarput 'aqqusaaginnassaasi' – uagut akisarpugut: 'ullorsiutigut takulaariarlugit.'
Ukiormanna tuttunniarfiup kingorna Qulup neqi Aarhusimut nassiuppaa, sanilillu tallimanngornermi aggerusunnersut aperalugit.
- Qulup aamma Inaluup qallunaarpasinnerulaalersimanerat ullumikkut eqqarsaatiginngitsoorsinnaanngilara. Uagut qallunaat suna tamaat pilersaarusiortaripput paasisimagaat. Inuuneq aamma nereqatigiinnissamullu isumaqatigiissusiornerit. Tamanna uggornalaarpoq.
Qulu aamma Inaluk ukiup affaa qaangiuppat Nunatsinnut utissapput.
- Maqaasissavagut, nereqatigiittarnigullu maqaasillugit, Thomas Gam Nielsen videoliamini oqarpoq.
Oqaluttuaq tamaat uani takusinnaavat.
Video uani aamma ataani takusinnaavat.