Nuuk
Tuttunniartarnermut malittarisassat nutaat najukkami politikerit isornartorsiorpaat
Nuummi piniarnermut piffissarititaasut, pisassiissutillu agguarneri amerlassusileriikkat, sunngiffimmilu pinialuttartunut annertuallaamik killilersuiffigineqarput, Sermersuumi najukkami politikerit isumaqarput
Namminersorlutik Oqartussat tuttunik piniarnermut piffissarititaat nutaat, aamma pisassiissutit agguarneri amerlassusileriikkat nutaat, piffissami matumani tusarniaaffigineqartut Isumaginninnermut, Suliffeqarnermut Inuussutissarsiornermullu Ataatsimiititamit sakkortuumik isornartorsiorneqarput.
Sunngiffimmi piniartunut malittarisassat sukangasut
Nalunaarummi inuussutissarsiutigalugu piniartunut pisassiissutit suli killiligaanngillat, sunngiffimmili pinialuttartut Nuummi aqutsiveqarfiit marluusut akornanni piniarnissamut akuersissummik piniarfigisassaq sorliussanersoq toqqartussanngorpaat, tallimanik pisaqarsinnaatitaallutik, aamma piffissarititaasoq tamaat tuttunniarfissami tallimaannarnik pisaqarsinnaallutik.
Atuaruk: Sunngiffimmi piniareernermi pisanik nalunaartut amerlanngitsut
Malittarisassat nalunaarutigineqartut naapertorlugit, sunngiffimmi pinialuttartut sumiiffimmik ataasiinnarmik aalajangertassapput.
- Tuttunniarluni aavartarneq kalaallit kulturitsinnut ileqqutoqqatsinnullu annertuumik ilaavoq, tassaallunilu inuiaqatigiinni ataatsimoorfipput, Isumaginninnermut, Suliffeqarnermut Inuussutissarsiornermullu Ataatsimiititap siulittaasua, Malene Lynge, taama oqarpoq.
Ilanngunneqanngitsut
- Ilaqutariippassuarni ilaquttanut utoqqasaajunerusunut uumasunik piniussisarneq aamma ileqqutoqaavoq, taamaalilluni taakkununnga aningaasaqarnerup ajunnginnerusumik ingerlanissaanut iluaqutaasarluni.
Ataatsimiititap sunngiffimmi pinialuttartut piniarnissaminnut killilersuiffigineqarnerat, aamma biologinit siunnersuinermik tunngavilersuinermilluunniit pisoqarsimannginnera tupigaat, aamma inuussutissarsiutigalugu piniartunut pisassat killeqannginneri suli attanneqarmata.
Atuaruk: Unammisitsinermi Kalaallit Nunaanni Tuttu Kusanarnerpaami ajugaasoq
- Sunngiffimmi pinialuttartut aamma inuussutissarsiutigalugu piniartut akornanni naligiissitsisoqarnissaa pillugu paasinnippugut, kisianni aaqqiissut taanna sunngiffimmi pinialuttartunut annertuallaamik kinguneqassaaq, Malene Lynge oqarpoq.
Peqatigitillugu ataatsimiititaq isumaqarpoq, nalunaarut piniarfinnut ataasiakkaaginnarnut taamaallaat atortinneqassasoq, tassani sunngiffimmi pinialuttartut aqutsiveqarfimmik ataatsimut piniarnissamut killilikkamik toqqaasussanngormata.
Peqatigitillugu ataatsimiititaq isumaqarpoq, nalunaarut piniarfinnut ataasiakkaaginnarnut taamaallaat atortinneqassasoq, tassani sunngiffimmi pinialuttartut aqutsiveqarfimmik ataatsimut piniarnissamut killilikkamik toqqaasussanngormata.