qinersineq

Tusagassiuutit Siumup salliutitsineraaneranut illuatungiliipput

Siumup qineqqusaartitai marluk tusagassiuutit qineqqusaartitsinerannut sisamanngornermi isornartorsiuipput. Maanna KNR aamma Sermitsiaq.AG akissuteqarput

- KNR-ip tusagassiuuteqarneq nukittorsaavigineqassappat tikilluaqquaa. Tusagassiuutinut tunngasunik ilisimatusarsimasut pasilliutit taamaassorinninnerillu qulaajarsinnaavaat, aamma qanoq pitsaanerulersinnaanitsinnut isumassarsiorfiusinnaapput, Mikkel Bjarnø Lund KNR-imi nutaarsiassaqartitsinermi pisortaq oqarpoq. Assimi takuneqarsinnaavoq Mikkel Bjarnø Lund tununngasoq. Assimiipput aamma Inuit Ataqatigiit siulittaasuat Sara Olsvig kiisalu Siumup siulittaasua Kim Kielsen

Inatsisartunut qinersinissamut ullut arlaqarunnaartut Siumut tunuliaqutaralugu Inatsisartunut qinigassanngortittut marluk tusagassiuutit isornartorsiorpaat.

Siumup Inatsisartunut qinigassanngortitaata Kenneth Rasmussenip tusagassiuutit atuisartut iluarisimaarinninnerannik misissuinissaannut kaammattorai, parteeqataa Pater Davidsen isumaqarpoq piffissanngortoq tusagassiuutit pillugit ilisimatusartut nunatsinni tusagasseeriaaseq qissimigaartariaqaleraat.

Kisianni KNR-ip aamma Sermitsiaq.AG-ip nittartagaata Siumukkormiut tusagassiuutinut uparuaanera illuatungilerpaat.

- KNR tusarnaartartuminut, isiginnaartartuminut atuartartuminullu tusagassiuutinut iluarisimaarinnittoqarnersoq pillugu misissuisitsisarpoq. Misissuinerullu takutittarpaat innuttaasut nalinginnaasumik KNR-imik suliaanillu iluarisimaarinnittartut. Pitsaanerusinnaavugut aamma ullut tamaasa pitsaanerusumik tunniussaqarusuttarpugut.

KNR-imi nutaarsiassaqartitsinermut pisortaq Mikkel Bjarnø Lund Sermitsiaq.AG-mut taama oqarpoq.

Atuaruk: Tusagassiuutit qineqqusaartitsisarnerat Siumumit isornartorsiorneqarpoq

KNR: Tusagassiortut partiinut ilaasortaanngillat
Peter Davidsenip oqarnera malillugu sineriammiut oqaatigisarpaat tusagassiorfiit Inuit Ataqatigiit salliutittaraat. Facebookiimi oqallinnermi aamma tamanna maluginiartarnerarpaa. Kisianni aamma taamatut isornartorsiunera illuatungilerneqarpoq:

- Tusagassiortuusugut uagut partiinut ilaasortaaffeqanngitsugut uppernarsarsinnaavara. Tusagassiortut nakorsatut sulisarput, inunnik assigiinngitsitsineq ajorput. KNR partiimut allamulluunniit attuumassuteqartussaanngilaq, isornartorsiuisartussaavoq kisianni aamma unneqqarissuusussaalluni. Aamma isumaqapunga taamaattoq, Mikkel Bjarnø Lund oqarpoq nangillunilu:

- Isornartorsiorneqarluni pitsaasuuvoq, kisianni assersuutinik tigussaasunik amigaateqarpugut. Pasilliuterpassuupput, kisianni tigussaasunik assersuutissartakitsut, taamaammat isummerfigiuminaapput. Aamma tusagassiuutit pillugit maalaaruteqartarfimmi KNR-imi suliagut anngunneqarpiarneq ajorput.

Tusagassiuutit nukittorsarneqarsinnaanerat tikilluaqqugaa
Siumup Inatsisartunut qineqqusaartitaa Peter Daviseni isumaqarpoq politikkikkut oqallinneq qaffasissoq inuiaqatigiinni anguneqassappat, taava tusagassiuutit arlaannaannulluunniit attuumassuteqanngitsut pisariaqartut.

- Tamanna qulakkeerneqassappat piffissanngorpoq tusagassiutinut tunngasunik ilisimatusartumik misissuiffigineqarnissaa, Peter Davidsen sisamanngormat taama oqarpoq.

- KNR-ip tusagassiuuteqarneq nukittorsaavigineqassappat tikilluaqquaa. Tusagassiuutinut tunngasunik ilisimatusarsimasut pasilliutit taamaassorinninnerillu qulaajarsinnaavaat, aamma qanoq pitsaanerulersinnaanitsinnut isumassarsiorfiusinnaapput. Uani aamma pingaaruteqarpoq inuiaqatigiit sinnerlugit pissutsinut isornartorsiuisarnissatsinnut pisussaaffipput naammassisarneripput, saniatigut innuttaasut pisunik pingaarnernik paasisitsivigisarnerannik.

Tusagassiortut aaqqissuisullu tamatigoortuupput
Taanna Søren Duran Duusimit, Sermitsiaq.AG-mi aaqqissuisumit taperserneqarpoq.

- Sermitsiaq.AG namminersortutut ingerlanermini tusagassiuinermik aallutaqatiminut unammillertiminullu innuttaasunik kiffartuussinissamut pisussaaffilinnut assigusunik pisussaaffeqanngilaq, kisianni eqqaamsariaqarpoq tusagassiortut aaqqissuisullu ilinniarsimasuullutik tamatigoortuummata. Soorlu ilinniarsimavugut suliffiup namminerlu inuunerup immikkoortisinnaaneranut, kiisalu politikikkut isummat immikkoortissinnaaneranut.

- Tunngavissaqarluartumik, ingammillu uppernarsaatilimmik, isornartorsiorneqarneq iluarpoq, kisianni Siumut kaammattorusuppara tusagassiuutinut Inuit Ataqatigiinnik salliutitsineraanerminut uppernarsaaqqullugu. Aamma Inuit Ataqatigiinnit aqunneqarsimagaluarutta
Katuami novembarip 17-ani innuttaasunik ataatsimiisitsimanavianngilarpugut GME-llu pisortaanera John Mair tamaani nittartakkami chat-ertissimanavianngikkaluarparput, Søren Duran Duus erseqqissaavoq.

Per Berthelsenip Siumumeersup naammagittaalliutiginikuuaa Sermitsiap allaaserisai saqqummiunneq ajorai, kisianni aviisi taassumannga allaaserisarnik tigusaqarnikuunngilaq.

Sermitsiap nammineerluni sapaatip akunneranit 41-mit 46-mut aviisini saqqummersuni misissuineranit erserpoq partiit eqqartorneqarneri angissusaasunut sanilliullugit naleqquttut. Sermitsiap tallimanngorpat saqqummeruni politikerit pasilliutaat allaaserineqartartullu aammalu partiikkaarluni atuartartutut allakkat nalunaarsorneri saqqummiutissavai.

Sermitsiaq.AG-mit aamma Tusagassiuinermik Sulisut Peqatigiiffiata siulittaasua Mariia Simonsen oqaaseqartinniarsimagaluarparput. Kisianni taanna tusagassiuutit pineqartut pillugit akissusserusussimanngilaq.

Powered by Labrador CMS