Tusagassiuutit qineqqusaartitsisarnerat Siumumit isornartorsiorneqarpoq

Inatsisartunut qinersinissamut sapaatip akunnera ataasiinnanngortoq, Siumut tunuliaqutaralugu Inatsisartunut qinigassanngortittut marluk tusagassiuutit isornartorsiorpaat.

Tusagssiuutitigut iluarisimaarinninneq pillugu misissuisoqartariaqartoq Kenneth Rasmussen siunnersuuteqarpoq.

- Misissuinermi innuttaasut tugassiortut politikkikkut pituttorsimanngitsumik allariaaseqarnersut aammalu sumulluunniit attuumassuteqanngitsumik tunngaveqartumik tusagassiisarnersut ilanngunneqassasoq pingaaruteqarluinnarpoq, tusagassiutinut nalunaarummi allappoq.

- Tupigusuutigisarpara tusagassioriaaseq pillugu pitsaasuuneranik pitsaanngitsuuneranilluunniit tunngasunik nutaarsiassaqartitsisoqarneq ajortoq, imaassimanerpa isornartorsiorneqarnissaq ersissutigineqartartoq? Tusagassiorfiit imminut sakkortuumik illuatungilersinnaasariaqarput tassuunatigummi pisussaaffik kajungernarneq anneq massa pissarsiarisinnaallugu pitsaassutsimut iluaqusiisinnaasoq, Kenneth Rasmussen nassuiaavoq.

Ilisimatuut
Parteeqataa, Inatsisartunut aamma qinigassanngortittoq Peter Davidsen, isumaqarpoq, Nunatsinni tusagassioriaaseq Tusagassiutinut tunngasunik ilisimatusartunik nalilersorneqartariaqartoq.

- Sapaammi Nuup Katersortarfiani Nuuk TV-ip qineqqusaartitsinerani Partii Inuit oqaatigaat tusagssiorfiit IA-mut qaninngorpallaarneralugit, tamannalu pattaannermik kinguneqartinneqarpoq aamma partiit allat aallartitaanniit pattaannikkut oqaatigineqartoq ilalerneqartoq, Peter Davidsen oqarpoq.

Peter Davidsen aamma oqarpoq, sineriammiut oqaatigisaraat tusagassiorfiit Inuit Ataqatigiit salliutittaraat. Facebookiimi oqallinnermi aamma tamanna maluginiartarpaa.

- Inuiaqatigiinniit taamatut tusagassiutinut isiginnileriartornerat uppernarsaatissaqanngikkaluartoq oqallinneq annertusiartuinnarpoq, tamannalu tamat oqartussaaqataanerannik innarliisinnaavoq iliuuseqarfiginngikkutsigu, Peter Davidsen oqarpoq.

Nangillunilu:

- Nunatsinni politikkikkut oqallinneq qaffasissoq qulakkiissagutsigu tusagassiutit partiit arlaannaannulluunniit attuumassuteqanngitsumik tunngavissalimmik inuiaqatigiinnut paasissutissiisussaapput, tamannalu qulaqqeerneqassappat piffissanngorpoq tusagassiutinut tunngasunik ilisimatusartumik misissuiffigineqarnissaa.