tusagassiuutit
Tusagassiuutinut tapiisarnerit Naalakkersuisunit allanngortinniarneqartoq
Naalakkersuisut siulittaasuat Aleqa Hammond Siumumeersoq tamanna nalunarrutigaa
Naalakkersuisut Sermitsiamit Atuagagdliutinullu ukiumut 2,5 million koruuninik unitsinniaraat qaammammi uani aalassassimaarutigineqarpoq.
Tusagassiivik Sermitsiaq.AG-mut tapiisarunnaarneq pissuteqarpoq ukiuni pingasuni kingullerni tusagassiiviup 5,7 million koruuninik sinneqartoornera. Tapiissutit ilanngukkaanni 11,2 million koruuniullutik.
Tamanna pillugu Inuit Ataqatigiinnit Inatsisartuni ilaasortap Naaja Nathanielsenip isornartorsiuerpalaartumik apeqquteqarpoq.
Naak inatsimmi allaqqasoqaraluartoq tapiissutigineqartut tiguneqartussaagaluartut, taamaakkaluartorli tamanna Naalakkersuisunit atuutsinneqanngilaq. Tamannalu pillugu apeqquteqarpoq. Aviisinut tapiissutigineqartartut peersinneqassanersut Naaja Nathanielsen apeqquteqarmat Aleqa Hammond ima akivoq:
- Naalakkersuisut 2014-mi ukiakkut ataatsimiinnermi siunnersuutiginiarpaat konto 10.06.24-imut oqaasertaliussat siunissami allanngortinneqarnissaat, taamaalilluni tusagassiiviit Kalaallit Nunaanniittut tamarmik tapiissutinik qinnuteqarsinnaalersillugit.