Tusagassiuuteqarfiit kalaallisut pitsaanerulissasut

Tusagassiuuteqarfinni kalaallisut oqaatsivut pillugit nukittorsarneqassapput. Mimi Karlsenip (IA) tamanna pingaartitaraa.

Oqaatsinillu kiffartuussivimmik, oqaatsit iluamik atorneqarnissaannik qulakkeerinnittussaq, pilersitsiniarnera Inatsisartunit taperserneqarpoq.

Siunnersuut ukiut arlallit siunertaq aallunneqarsimasoq Inatsisartuni siullermeerinninnermi akuersissutigineqarpoq. Oqaatsinillu kiffartuussiviup kiisami pilersinneqarnialernera Mimi Karlsenip iluarisimaarpaa.

- Nuannaarutigivarput suliaq ingerlaqqittussanngormat, alloriarnerlu siulleq tigussaasunngorlugu suliakkiutigineqarmat, taanna tusagassiuutinut nalunaarummi allappoq.

Aamma atuaruk: Siunnersuut: Tusagassiorfiit kalaallisut oqaatsitik pitsanngortittariaqarpaat

Oqaatsitta inerisarnissaanut pisussaaffiliisoq

Mimi Karlsenip siunnersuummik saqqummiinermini erseqqissaatigaa, Inuit akornanni kalaallit kisimik oqaatsiminnik suli atuisut, inuiaqatigiimmi oqaatsinik illersuiuarsimammata.

Taassuma naqissuserpaa Nunatsinni oqaatsivut kinaassutitsinnut nukittoqutigalugit ingerlajuarsimavugut. Namminersuleratta Nunatsinni oqaatsivut pisortatigoortumik oqaasiuneri naqissuserneqarput.

- Tamannalu pisussaaffiliivoq. Pisussaaffiliivoq oqaatsitsinnik ineriartortitsiuarnissamik, navianartorsiortutullu inissikkaangata illersuinissamik, soorlu siuligut aamma taama pisartut., taanna oqalugiaammini oqarpoq.

Perorsaanermi oqaatsit atorneqarnerisa saniatigut, tusagassiuuteqarfiit oqaatsinik atueriaasiat aamma pingaaruteqartutut isigaa.

- Pingaarluinnarporlu inuiaqatigiinni perorsaanerup ilinniartitaanerullu avataani oqaatsinik nittarsaassisuusut tassa tusagassiorfiit akisussaaffeqarnerat qulakkeerniassallutigu., taanna tusagassiuutinut nalunaarummi allappoq.

- Nutserinerlunnerit amerlavallaarput

- Tusagassiorfinni oqaatsivut danskisuumiit nutsikkatut atorneqartarput, ilaatigullu kukkunilimmik atorneqartarlutik, taanna saqqummiinermi oqarpoq.

Oqaatsinik kiffartuussiviup tusagassiorfiiit neqeroorfigineqarsinnaasariaqarpai oqaatsitsinnut pikkorissarnissaminnik aammalu siunnersorneqarnissaminnik, aammalu oqaatitta iluamik atorneqarnerinik.

Siunnersuut Naalakkersuisunit taperserneqarpoq.

Illuatungiliuttut oqaasileriffik nukkittorsarukkaat

Illuatungiliuttulli, Demokraatit Atassullu suliassaq Oqaasileriffimmiittariaqartoq isumaqarput.

Partiit ataatsimoorussamik oqaaseqarnerminni oqaasileriffik ukiarmi digitalikkut nutserinermut atugassaannik annertuumik aningaasaliiffigineqareersimasut, taannalu tusagassiortunit atorluarneqarsinnaasoq, partiit taakku isumaqarput.

- Pingeriikkagut atorluarlugit oqaasileriffiup pilersitai siunissami atorluarniartigit, Demokraatit Atassullu ataatsimoorussamik oqaaseqaataanni taama allassimasoqarpoq.