tusagassiuineq
Tusagassiortoq sillimmartaaqqusisoq: Tusagassiorneq ulorianartorsiorpoq
Tusagassiortup Irene Jeppsonip kalaallit tusagassioriaasiat assut ernumanartoqartippaa, KNR-imullu toqqaannartumik isornartorsiulluni. KNR-illu aaqqissuussaanermini equgasoqarnera nassuerutigaa.
Atuartartup allagaani, Irene Jeppsonip Sermitsiaq.AG-mut nassiussimasamini isummersorpoq, "Tusagassioriaaseq ulorianartorsiorpoq" aammalu "Kalaallit Nunaanni tusagassioriaaseq equngasumik ingerlavoq".
Ernumasoq
Taassuma ernumassutigalugulu eqqarsarnartoqartippaa, ukioq manna septembarip aallaqqaataani tusagassiortunngornianik naammattunik qinnuteqartoqarsimannginnera, kingunerisaanillu ilinniarneq aatsaat ukiup tulliani aallartissinnaassalluni.
- Naanguku inuiaqatigiinni qaqileriniartut. Nunatsinni tusagassiornerup silarsuaani allannguerusuttut sumiippat?, taanna atuartartut allagaanni aperivoq KNR-imulli tikkuaalluni, Irene Jeppsonimi naapertorlugu inunnik tv-miillaqqissunik radiomiillaqqissunilluunniit atorfinitsitsisarmat.
- Inuit ”aqqusinerminngaanniit tiguinnakkat”. Oqallisaarutissanik, inuusuttunut aallakaatitassanik il.il suliaqartinneqartut. Qulequttat qaqinneqartut amerlanerit pissanganarput soqutiginarlutillu, taanna erseqqissaavoq, mianersoqqusivorli:
Illuinnarsiortumik tusagassiuineq
- Ajornartorsiulli tassaavoq illuinnarsiorluni tusagassiineq ingerlanneqarmat, tusagassiinerlu isornartorsiuinertaqanngimmat. Taamatut tusagassiineq tulluanngilluinnarpoq ajoqutaalluinnarlunilu, atuartartut allagaannik allattoq oqarpoq.
Atuartartup allagaa tamakkerlugu atuaruk: Sunaana anguniagaasoq
Irene Jeppsonip aallakaatitassiaq Mudi Kramer Berthelsen ”Mudi tv” tikkuarpaa. Irene Jeppsonillu ajornartorsiutaanerarpaa, "pulaartut qanorsuarluunniit eqqartuisinneqartarput illuatungilerneqaratik", ilanngullugulu tikkuarpaa KNR ileqqorissaarnermik amigaateqartoq.
Aallakaatitami amigaat utoqqatsissutigineqartoq
KNR-ip pisortaanerata Karl-Hendrik Simonsenip Sermitsiaq.AG-mut oqaatigaa ileqqorissaarneq tusagassiuinermi aallakaatitanilu oqallissaarutini sakkoq pingaarnersaasoq, "isiginnaartartutsinnut, tusarnaartartutsinnut atuisutsinnulli paasissutissat eqqortut anngunneqarnissaat eriagisassaraarput".
- Taamaammat assut utoqqatsissutigaarput, sisamanngornermit 12. oktober 2017 TV'kkut aallakaatitassiami aallakaatitatsinni pitsaassutsinut kissaatigisanut naapertuutinngimmat, aallakaatitassiarlu oqallissaarutitut atorneqarsinnaannginnera oqaatigalugu. Tamanna KNR-imi suleriaatsimut najoqqutassianiluunniit kukkuneq pissutaavoq, Karl-Hendrik Simonsen nassuiaavoq, aaqqissuisoqarfillu suleriaatsimik najoqqutassianillu sukaterisimanera, ilanngullugu oqaatigaa.
KNR-p pisortaanerata tikkuarpaa, tusagassiortunik ilinniarsimasunik atorfinitsitsarneq, pingaartumik aallakaatitassianut tusagassiunermik sammisaqarfiusut, soorlu oqallissaarutitut aallakaatitat tusagassiornermik ilinniarsimasunit aaqqissuisunillu atorfeqartinneqartut.
Tusagassiortut kalaallisut oqaasillit amigaatigineqartut
Tusagassiortutut ilinniarsimasut kalaallisut oqaasilit amigaataaneri, Karl-Henrik Simonsenip aliasuutigaa,
- Nunatsinni tusagassiortorpassuaqarpoq, taamaakkaluartoq KNR namminersortunut pisortallu ingerlatsiviinut unammillerniapiloorpoq, taakkumi tusagassiortunik attaveqatigiinnermut sulisutut atorfinititsisarput, KNR-illu isumaqatigiissutaaniit akissaasersorneqarneri atorfininnermi atugassarititaat allaanerulluinnarput, taanna erseqqissaavoq.