Tusagassiornermik Nakkutilliisoqarfiup isorinninnerata kingorna oqallinnermi malittarisassat nutarterneqarput

Sermitsiaq.AG-p qanittukkut aaqqissuisoqarfiup oqaaseqaateqarnermut najoqqutassai, malittarisassai piumasaqaataalu nutarterpai, atuartartutta allaaserisatsinnut oqaaseqaatinik allattartorujussuummata.

Nutarterineq pivoq Tusagassiornermik Nakkutilliisoqarfiup aalajangiinermini isornartorsioreeraa malittarisassat ersernerluttuusut.

Maalaarut

Atuartartoq 2014-imi nakkutilliisoqarfimmut maalaaruteqarpoq, inuiaqatigiinni assigiinngissuteqarneq pillugu oqallinnermut atatillugu taassuma oqaaseqaataa peerneqarsimammat.

Maalaaruteqartup taamani ilanngussaq, atuartartup allap allataa, oqaaseqarfigaa. Tamatumali kingorna oqallinneq tamarmi ataqatigiikkunnaarpoq, tassa Sermitsiaq.AG-p oqaaseqaatinik naliliisartua naliliimmat, ilanngussisup ataatsip arlallilluunniitd malittarisassat malinngikkaat. Taamaattoqartillugu oqallinnerup ataqatigiinnera tamarmi tammartarpoq, software-tsinni teknikkikkut killiliinerdummat uagut soriarsinnaanngisarput.

Suliassaq Tusagassiornermik Nakkutilliisoqarfimmut anngunneqarpoq, maalaaruteqartoq isumaqarmat killiligaanngitsumik oqaaseqarsinnaatitaanini innarlerneqartoq. Nakkutilliisoqarfillu suliassap suliarinerani naliliivoq najoqqutassiaq tamatumunnga atatillugu ersernerluttoq.

Tusaatissatut tiguvarput

Tusagassiornermik Nakkutilliisoqarfiup aalajangiinera Sermitsiaq.AG-p tusaatissatut tiguvaa maannalu malittarisassat nutarterlugit.

Nakkutilliisoqarfik 2015-imi juulimi aalajangiivoq, taamaattumillu Sermitsiaq.AG-p suliap taama sivisutigisumik suliarineqarsimanera Nakkutilliisoqarfiup siulittaasuanut, landsdommer Søren Søndergaard Hansenimut, ajuusaarnartissimavaa.