Tusagassiorfimmi Sermitsiaq.AG-mi pisortat nikinnerat

Tamanna kinguaariit nikinnerannut sivisuumik piareersarneqarsimasumut atatillugu pisoq, siulersuisut ilisimatitsipput. Pisortat nikinnerat marsip aallaqqaataani 2017-imi pissaaq.

Christian Schultz-Lorentzen, AG-mi ukiuni kingullerni 18-ini sulisimasoq, pisortaq Poul Krarup, 1. januar 1990-imiilli pisortaasimasoq, taarserlugu pisortanngussaaq. Christian tamatuma peqatigisaanik AG-mi aaqqissuisuunertut ingerlaannassaaq.

Nammineq kissaatigalugu tunuartoq
- Poul Krarup nammineq kissaateqarnini tunngavigalugu pisortatut tunuartussanngorpoq. Siulersuisut peqatigalugit kinguaariit nikinnissaat pilersaarusiorsimavaa. Tamanna piffissami Sermitsiaq.AG-p tusagassiornikkut aningaasaqarnikkullu ullumikkutut aatsaat taama nukittutigisumik inissisimaffigisaani pissaaq. Kalaallit Nunaanni inuiaqatigiinnut nuannaarutaasussamik angusaq annertooq. Poul, qujanaq, siulersuisuni siulittaasoq Jørgen Ejbøll oqarpoq, Poul Krarup Sermitsiami aaqqissuisuunertut ingerlaannassasoq ilisimatitsissutigaa.

- Christian Schultz-Lorentzen Sermitsiaq.AG-mut pisortatut nutaatut tikilluaqquarput. Christian aaqqissuisuunertut aviisimullu aqutsisutut piginnaaneqarluartuunerminik
takutitsisimavoq. Angusanik uppernassuseqarluartunik pilersitsisarsimavoq. Suliffeqarfik tusagassiuuteqarnikkut pissusiviusuni ilungersunartuni isumannaatsumik
isumaginnittussaqalerpoq, siulersuisut siulittaasuat Jørgen Ejbøl oqarpoq.

Tusagassiorfik aningaasaateqarfimmit pigineqartoq
Christian Schultz-Lorentzenip tusagassiorfiup ineriartornerata ingerlateqqinnissaa qilanaaraa.

- Tusagassiorfik nutaarsiassanut nittartakkat nunatsinni annerpaartaat Sermitsiaq.AG, Nuuk Ugeavis, Suluk, Arnanut aviisillu nuna tamakkerlugu saqqummersartut Sermitsiaq
aamma AG aqqutigalugit asseqanngitsumik inissisimaffeqarpoq – tamallu naalakkersueqataanerannik annertuumik akisussaaffeqarluni. Tassunga atatillugu tusagassiorfiup aningaasaateqarfimmit inuussutissarsiummik ingerlatsisumit ingerlatarineqarnera erseqqissaatigissallugu pingaaruteqarpoq. Piginnittunut immikkut iluaqusersorneqartunut aningaasanik katersisoqanngilaq. Iluanaarutigineqartut tamarmik tusagassiornerup arlaannaannulluunniit attuumassuteqanngitsup, tamat naalakkersueqataaneranni tamani aalajangiisuulluinnartup, qulakkeerneqarnissaanut annertusarneqarnissaanullu atorneqartarput, Christian Schultz-Lorentzen oqarpoq, nangillunilu:

- Poul Krarup misilittakkani attaveqarfippassuaqarninilu tunngavigalugit suliffeqarfimmut atuartartutsinnullu suli annertuumik pissarsiaqaataassaaq. Tusagassiorfiup ajornanngitsuinnarnik atugassaqartitaajuarsimanngitsup ineriartortinneqarneranut pingaarnertut ingerlatsisuusimavoq. Minnerunngitsumillu tusagassiorfitoqqat marluk AG-p Sermitsiallu kattunnerannik ajornaatsuinnaanngitsumik naammassisaqarsimalluni. Tamanna ataqqineqartariaqarpoq. Kisianni aamma immikkut kajumissuseqalissutaasumik, anguniakkat sivisuumik qaffasissimammata, Christian Schultz-Lorentzen oqarpoq.

''Nukittuumik toqqaaneq''
Poul Krarup naammagisimaarinnilluni pisortaaffik Christian Schultz-Lorentzenimut ingerlateqqippaa.

- Christian Schultz-Lorentzen tusagassiorfimmik ingerlatitseqqiisussatut kissalaarnerpaanik oqaaseqaatissaqartippara. Siulersuisut matumani pitsaasumik nukittuumillu toqqaasimapput. Ineriartornermi AG-p aqqusaarsimasaani ukiut marlussuit matuma siorna aaqqissuisuunertut atorfinikkamili aviisit silarsuaanni piginnaaneqarluarnerminik takutitsisimavoq. Tamatuma peqatigisaanik Suluk ukiuni arlalinngortuni ukiunilu kingullerni Arnanut akisussaaffigisimavai. Atuagassiat taakkua marluk pitsaalluinnartuupput. Suliffeqarfik ukiuni kingullerni marluulluta suleqatigiinnikkut ingerlassimavarput, taamaattumik Christian Schultz-Lorentzen pisortanngornissamut piukkunnaateqarnerpaavoq, Poul Krarup oqarpoq, ilanngullugulu oqaatigaa:

- Taamaattumik suliassaq toqqissisimalluinnarlunga inuttaanut tunniutissavara.