Tusagassiorfik: Nuummi filmfestivaalertoqarnerani atorfilittat Tibetimut tapersersuisoq ingerlaqqugaat

Nuummi tamanut ammasumik aggustimi aaqqissuussami Kinamiunik aallartitanik peqataaffigineqartumi, Nunatsinni Nunanut Allanut Pisortaqarfimmi qaffasissumik atorfilittat marluk, Tibetimut tapersersuisumik ingerlaqqusisimapput.

Radio24syv Tibetimut tapersersuisumik pineqartumit oqaloqatiginnissimasoq taama allaaserisaqarpoq, tassanilu pisup allamit aaqqissuussamut peqataasumut tusarfimmut uppernarsaatitsisimapput, tamannalu aggustip 7-anni Katuami pivoq.

Tamanut ammasumik tassani ‘’Kinesisk Filmfestival’’-imut qaaqqusisoqarpoq, Kinamiut Danmarkimi aallartitaat, Deng Ying, ammaanersiornermi peqataavoq.

Jan Seidsen 47-nik ukiulik, Kalaallit Nunaanni 1994-mili najugaqartoq, aaqqissuussamut peqataavoq, peqataanerminilu tujuuluaraq ‘’Free Tibet’’-mik allaqqasoq atorpaa, Tibetip erfalasua aamma Kinap inuit pisinnaatitaaffiinik Tibetimi unioqqutitsinera pillugu paasissutissat naqitani nassarpai.

- Tibetimi inuit pisinnaatitaaffii Kinap sussarinngivippai, Danmarkip Kalaallit Nunaanni ajortumik nunasiaateqarsimaneranik oqaluttoqarpoq, isumaqarpungalu maani namminiileriartortoqartoq, Danmarkilu isornartorsiorneqartorujussuulluni, aamma Danmark Kinamik taarserniarneqarluni. Kisianni Danmarki ajorsimappat, taava Kina qanoq issava? Jan Seidsen, taamatut aggernerminut tunuliaqutini pillugu Radio24syv taama oqaluttuarfigaa.

Kulturip illorsuani filmip siulliup takutinneqannginnerani ilasseqatigiittoqartoq, Jan Seidsen oqaluttuarpoq, tassanilu inunnut 20-25-t missaanniittunut quppersakkanik tigusisoqarusunnersoq apersuivoq.

- Eqqissillunga angalaarpunga, nipera nippannagu. Inuit ilassillugit quppersakkamik neqeroorfigaakka, ilaat tigusiumapput, ilaallu piumanngillat, taanna oqarpoq.

Tassanngaannaq atorfilittaq Jan Seidsenimut saaffiginnippoq:

- Quppersakkanik agguaaninni angut uannut aggerpoq, quppersakkanik agguaanera assuarnarigamikku aaqqissuussamiillu qimagukkusunnersunga aperivoq, Jan Seidsen oqaluttuarpoq, taanna qimagukkusussimanngilaq.

Atorfilittaq Nunanut Allanut Pisortaqarfimmi periaasissanik aqutsisuuneruvoq, kinguninngua atorfilittaq allat Jan Seidsenimut orniguppoq. Taanna naalakkersuisoqarfimmi pisortaavoq.

- Tamanna oqaatigissallugu qissigusunnartuummat piffimmit qimagussinnaanersunga aperivoq, Kinamiut kamattorujussuusut tusasinnaavara, taassumalu aalassassimaarnerit eqqissisaaffiginiarsarai, Jan Seidsen oqarpoq.

Pisumut taanna pakatsisimaarpoq, sapaatip-akunnerinilu arlalinni aaqqissuussamit sooq qimagutsitaasimanerluni, aamma kiap isumassarsiarineraa akissutissarsiniarsarisimagaluarpaa.

- Ingasappoq. Ingerlaqquneqarnissara kia isumassarsiarineraa arfineq-pingasoriarlunga Nunanut Allanut Pisortaqarfik akissuteqaqqunikuuara. Apeqqummut tunngassuteqanngitsumut akissuteqarniarsariinnavipput, taanna oqarpoq.

Inatsisileritooq aamma isummersuisuni Justitiami pisortap, Jacob Mchangamap, Kinamut isorinnittunik oqariartuuteqarneq kisiat pissutigalugu Jan Seidsenip aaqqissuussamit ingerlaqqusisimanera ‘’isornartuusoq’’ oqaatigaa, kisianni tigusarineqanngimmat imaluunniit peersinneqarsimanngimmat, tamat oqartussaanerannut tunngassuteqanngitsoq, taanna naliliivoq.

- Kinamut isornartorsiorluni oqariartuuteqaannarluni ajornartorsiortitsinani imaluunniit aaqqissuussamik ajoqusiinani pisimaguni isornartoqarpoq. Kisianni tigusarineqarani, peersinneqarani inmaluunniit tujuuluaraa peeeqquneqanngimmat, taava oqartussaaqataaneranik ataqqinnittoqarsimavoq, Jacob Mchangama oqarpoq.

Radio24syv Nunanut Allanut Pisortaqarfimmut attaveqarluni apersuinissamik imaluunniit suliaq pillugu apeqqutinut allakkanut akissuteqarnissamut qinnuigineqarsimapput. Mailikkut ilisimatitsissutigineqarpoq, ‘’Nunanut Allanut Pisortaqarfiup Katuami pisup oqaluttuarineqarnera ilisarisinnaanagu’’ ilisimatitsissutigaa, kisianni naalakkersuisoqarfik apersuinermut imaluunniit apeqqutinut akissuteqarsinnaanngilaq.