Thule Air Base

Tusagassiorfik: Thulemi milliardilinnut isumaqatigiissut qallunaat ingerlatsiviisa annaavaat

Amerikami eqqartuussiviup Thule Air Base pillugu eqqartuussut akerlilerpaa, taamaasilluni isumaqatigiissut milliardilinnik nalilik amerikarmiut selskabiata pivaa, taamatut allappoq Finans

Amerikami eqqartuussivimmi ingerlatitseqqiffiusumi eqqartuussisut pingasut aalajangiipput Thule Air Basemi isumaqatigiissut milliardilinnik nalilik amerikarmiut selskabiata Exelis Services-ip pigigaa

Amerikarmiut eqqartuussivianni ingerlatitseqqiffiusumi eqqartuussisut pingasut aalajangiipput Thule Air Basemi isumaqatigiissut milliardilinnik nalilik assortuussutaasoq amerikarmiut selskabiata Exelis Servicesip tigussagaa. Taamatut allappoq Finans.

Finans naapertorlugu eqqartuussut suli tamanut saqqummiunneqanngilaq, paasisaqarfiilli attuumassuteqanngitsut tusagassiorfimmut uppernarsarpaat eqqartuussisut isumaqatigiissut Exelis Servicesimut iluaqutaasumik aalajangiisimasut.

Inatsisitigut ajorsarput

Finans naapertorlugu isumaqatigiissutip milliardilinnik nalillip assortuussutaanerani maanna qallunaat suliffeqarfissui pingasut inatsisitigut ajorsartut, taakkualu tassaapput Per Aarsleff, Copenhagen Arctic kiisalu Greenland Contractors, namminersorlutik oqartussanit piginneqataaffigineqartoq.

Taakkua pingasuullutik USA-mi eqqartuussivimmut suliassanngortitsipput 2014-imi USA-p illersornissaqarfiata Thule Air Basemi ukiunut arfineq-marlunnut kiffartuussinissamik isumaqatigiissut 2,4 milliarder koruuninik nalilik, amerikarmiut selskabiannut aningaasaqanngitsumut tunniummagu. Tunniussineq pivoq USA-p, Kalaallit Nunaata Danmarkillu isumaqatigiissutitoqaannut akerliusumik.

2015-imi juunimi amerikarmiut eqqartuussiviata isumaqatigiissut atorunnaarsippaa, Exelis isigineqarmat amerikarmiut selskabiata Vectrus-ip ataani selskabitut aningaasaqanngitsutut. Kisiannili tassa eqqartuussiviup ingerlatitseqqiffiup eqqartuussut taanna akerlilerpaa.

Akileraarutitigut akitsuutitigullu isertittakkat 10 procentii

Finans naapertorlugu amerikarmiut eqqartuussisui oqarput suliassami pineqartut suliarinnittussarsiuussinerup oqaasertai, nunani tamalaani isumaqatigiissutit pinnagit, soorlu ilaatigut Nunanut Allanut Tunngasunut Ministereqarfik isumaqarsimasoq.

– Immaqa naalagaaffiit taakkua marluk (Danmark USA-lu, aaqqiss.) siunertarisimavaat isumaqatigiissut nunat allamiut selskabiata immikkoortuanut tunniunneqartassanngitsoq. Taava naalakkersuisut tamanna isumagisassaraat. Isumaqatigiissutit atorunnaarsissinnaavaat isumaqatigiissullu suliarinnittussarsiuuteqqillugu. Matumani pineqartoq tassaavoq suliarinnittussarsiuunneqarnera, Finans naapertorlugu eqqartuussisut oqarput.

Siusinnerusukkut saqqummiunneqarsimavoq isumaqatigiissut Kalaallit Nunaata akileraarutitigut akitsuutitigullu isertittagaasa 10 procentiinik isertitsissutaasartoq.

Powered by Labrador CMS