Tusagassiorfik nutaaq digitaliusoq saqqummilersoq
Nittartagaq nutaaq maanna misilittarneqaleruttorpoq, taanna Nunarput pillugu nutaarsiassanik saqqummiussisassaaq. Nunarput.gl ulluni makkunani suliarineqaleruttorpoq, sapaatip-akunneratalu tulliani piariissangatinneqarluni.
Ole Aggo Markussen nutaarsiassaqartitsiviliortuuvoq, taanna ullumikkut kujataani ingerlatseqatigiiffimmi Arctic Prime Fisheriesimi programimik ataqatigiissaarisuuvoq.
Kajumissutsiminnik aningaasaliisut
Nittartagaq nutaarsiassaqartitsivik kalaallisut saqqummertassaq, Ole Aggo Markussen, Sermitsiaq.AG-mut ilisimatitsivoq, atuartartuniillu nammineq kajumissutsimik akiliisunik aningaasalersorneqassalluni.
- Alaskami aamma Canadami nutaarsiassaqartitsivinnut namminersortunut atuartartut kajumissutsiminnik tapiissuteqartartut takunikuuarput. Tamannalu tunngavik malersorniarparput, Ole Aggo Markussen, Sermitsiaq.AG-mut oqarpoq.
Kisianni kina nutaarsiassaqartitsivimmik suliaqarnersoq atuarneqarsinnaanngilaq?
- Maanna tamanna pillugu oqaluttuussinnaanngilakkit. Nittartagaq piareerpat aaqqissuisoqarfik pillugu paasissutissanik ilineqassapput, Ole Aggo Markussen ilisimatitsivoq.
Suliarineqartoq
Ole Aggo Markussenip oqarnera naapertorlugu, nutaarsiassaqartitsivik nutaarsiassanik allalluni aallartilaareerpoq, kisianni nittartagaq suli misilittarneqarlunilu suliarineqarpoq.
Nutaarsiassaqartitsivimmi nutaami kina aaqqissuisuua?
- Uanga aaqqissuisutut akisussaasuuvunga, Ole Aggo Markussen oqarpoq, taassuma tunuliaqutiminut apeqqummut tunngatillugu LinkedIn-iminut unnersuussivoq, tassani takuneqarsinnaavoq Arctic Prime Fisheriesimi programimik ataqatigiissaarisuusoq, Copenhagen Business Schoolimilu pikkorissarnernit arlalinnut peqataasarsimasoq, aamma Aarhus Universitetimi aqutsinermut inatsisilerinermullu tunuliaquteqartoq, kiisalu 1990-1991 ilinniartunut atuagassiami Avalanermik aaqqissuisuusimasoq.
Tusagassiorfik arlaannaanulluunniitt attuumassuteqanngitsoq
Nittartagaq nutaaq naapertorlugu, Nunarput.gl nutaarsiassaqartitsiviuvoq soqutigisaqaqatigiinnut politikkikkullu suliniaqatigiinnut arlaannaannulluunniit attuumassuteqanngitsoq.
- Tamannali isumaqanngilaq Nunarput isumaqanngitsoq. Inuit isummersornerat illersorparput, taamalu tamat oqartussaaqqataatillugit inuiaqatigiit ineriartortinnissaat pingaartillutigu, nittartagaq pillugu tamanna allanneqarsimavoq.