tunissuteqarneq
Tusagassiorfik nunaqarfimmi innuttaasunut eqqugaasunut 50.000 koruuninik tunissuteqarpoq
Uummannap eqqaani nunaqarfinni eqqugaasunut tusagassiorfik Sermitsiaq.AG 50.000 koruuninik tunissuteqarniarluni aalajangerpoq.
Ulluni kingullerni Uummannap eqqaani nunaqarfinni eqqugaasunut tapersiisorpassuaqarlunilu misiginneqataasorpassuaqaropq. Nuna tamakkerlugu aningaasanik tunissuteqartunit aamma atisanik tunissuteqartunit.
Aamma atuaruk: Suliffeqarfik 100.000 koruuninik tunissuteqartoq – atisanik katersineq aallartinneqarpoq
Tusagassiorfik Sermitsiaq.AG maanna aamma tassaarsuarmut eqqugaasunut 50.000 koruuninik tunissuteqarniarluni aalajangerpoq.
Inuit tupaqqapput
- Inuppassuit imaaliallaannaq angerlarsimaffitik inuuniarnermut tunngavitik annaavaat. Allat suli annaasaqarnerupput. Inuit soorunami tupaqqapput, tusagassiorfimmi pisortaq Christian Schultz-Lorentzen oqarpoq, nangillunilu:
- Ikiuukkusuttut amerlasugut aamma tapersersuilluta ikiuerusunnerput inunnut taakkununnga malugitinnissaa pingaarnerpaavoq. Amerlasuullu assatik isaatereerpaat. Uagut aamma taamaaliorpugut. Uummannap eqqaani pisoq tusagassiorfiup siulersuisuini siulittaasorlu, Jørgen Ejbølilu oqaloqatigiissutigaagut, tusagassiorfillu nunaqarfinni eqqugaasunut 50.000 koruuninik aningaasaliissasoq taanna akuersivoq.
Aamma atuaruk: Ajunaarnersuarmut eqqugaasunut Kujalleq 50.000 koruuninik tunissuteqarpoq
Kisimiinngitsoq
Kisianni tusagassiorfik eqqugaasunut aningaasanik tunissuteqarniarluni kisimi aalajanginngilaq.
Polar Seafoodip ingerlatseqatigiiffia Sigguk Nuummiittoq 100.000 koruuninik tunissuteqareerpoq, Kommune Kujalleq 50.000 koruunit, Seekon Radio Qaqortumiittoq 20.000 koruuninik, tapiissuteqartut saqqummiunneqartut tamakku ilaannaraat.