Københavnimi toqusoq
Tusagassiorfik: Immiussani tusaaneqarsinnaavoq kinaassusersiortoqarsimanngitsoq
Ambulancenut oqasuaatinut saaffiginnittarfimmi immiussarineqarsimasut tusaallugit sulisunit apeqqutigineqanngilaq angerlarsimaffeqanngitsoq kalaaliusimanersoq. Takunnittulli allatut eqqaamasaqarput
Angutip 32-nik ukiullip Københavnimi ataasinngornermi toquvoq. Kalaaliunera angerlarsimaffeqanngitsuuneralu pissutaalluni kinaassusersiorneqarpa?
Aap, Ulla Miilmann taama oqarpoq. Taassuma ambulacep takkunnissaa utaqqivaa.
Sermitsiaq.AG-mut ima nassuiaasareerpoq.
- Angutip eqqaanillunga arnaq ambulancinut sianeqqequara. 20 minutsit qaangiunnerini aamma arnaq alla sianeqqequara. Arnap sianertup kingulliup telefuuni iligamiuk arnaq sianertoq siulleq aperaa aamma aperitissimanersoq angut kalaaliunersoq, Ulla Miilmann tupaallaqqasoq oqarpoq.
Region Hovedstadens Akutberedskabip maanna pisoq misissuiffigaa. Sulisut ambulancemik aggersaanermut tigusisut pisut misissuiffigineqarnerani suliunnaarsinneqarallarnerannik kiguneqarluni.
- Peqqinnissaqarfimmi sulisut eqqarsarlutik ’kalaaliinnaasoq’ pilertornerusumik qisuariarsimanngippata, taava soraarsinneqartariaqarput. Immikkoortitsineruvormi, Jens Mandrup SF-imeersoq oqarpoq.
Immiussat: Kinaassusersiortoqanngilaq
Region Hovedstadenimi immiussarineqartuni angut kalaaliunersoq apeqqutigineqanngitsoq immiussami tusaaneqarsinnaasoq JyllandsPosten allappoq.
Aviisi ima allappoq:
'Aalakoortoqaannartoq siullermik nuutitsisarfimmit paasineqarpoq, taamaattumik nakorsaq Amagerbro Stationiliartinneqarpoq. Angut nalasoq kalaaliunersoq apeqqutigineqanngilaq. Nakorsaq politiinut sianerpoq, angullu anerningereersoq politiit takkupput. Politiit ambulancenik takkuttoqassasoq sianerput, minutsit pingasut qaangiunneranni takkupput.
Region Hovedstaden: Pisoq uggornartoq
Pisoq eqqunngitsumik suliarineqarsimasoq pigasuartoqartillugu saaffiginnittarfimmit nassuerutigineqarpoq.
- Siullermik sianertoqarneranit ambulancep takkunnissaata tungaanut piffissaq atorneqartoq sivisuallaarujussurpoq. Ambulancet apuummata angut anerningertareersimavoq. Tamanna ajuusaarnarpoq, tamannalu aamma uagutsinnut soorunami sunniuppoq, AMK-Vagtcentralenimi pisortaq Marit Karina Buccarella regionh.dk-mut oqarpoq.
Ilumut kukkusoqarsimanersoq suli misissuiffigineqarpoq.
Nalunaarusiaq aqagu piariissaaq
Misissuisoqarnerani sianertunik oqaluussisartut sulinngiffeqartinneqarallarput.
- Misissuinermi suut tamarmik qulaajarneqassapput, taamaattumik paasiniarneqassaaq ambulancet sooq taama sivisutigisumik apuunniarsimanersut, taamaattumik pitsaaneruvoq tassani oqaloqatiginnittuusut sulinngiffeqartinneqarnissaat, Marit Karina Buccarella oqarpoq.