Urani
Tusagassiorfik: IA-p GME unitsinniarlugu tamaviaarniarpoq
Kuannersuarni suliniut pillugu suli nalornisoqarpoq. Weekendavisenimi ullumi saqqummertumi, 'politikkikkut pissuteqartumik' suliniut unitsinnissanut Sara Olsvigip piareersimalluni naqissuserpaa
Siumup Inatsisartuni gruppiani siulittaasup Jens-Erik Kirkegaardip (S) uranitalinnik piaarusuttut puffassimaartut aningaasaleerusuttut eqqissisarniarlugit pingasunngornermi oqariartuuteqaraluarpoq.
- Naalakkersuisunngortup inatsisit malittariaqarpai, GME qinnuteqaateqarpat politikkikkut aalajangiiginnarsinnaanngilaq, taanna oqarpoq.
Atuaruk: S: GME-mut akuersissummik tunniussinissamut Múte akuersitinneqarsinnaavoq
Qinnuteqaat itigartinnissaanut IA piareersimasoq
Ullumikkut aviisimi Weekendavisenimi saqqummertumi IA-p siulittaasuata Sara Olsvigip nalornineq annertuseriartiinnarpaa. Partiip uranitalinnik qallueqqusivinnginneq attatiinnaraaa, taassuma naqissuserpaa, tamannalu aamma GME-p Kuannersuarni uranitalinnik saffiugassanillu qaqutigoortunik piaanissamut qinnuteqaataanut ingerlasumut atuunnerarpaa.
- Avatangiisit kisiisa pinnagit, kisianni aamma politikkimik pissuteqartumik GME-p naaggaarneqaratarsinnaalluni ilisimavaa, Sara Olsvig (IA) aviisimut oqarpoq.
- Ingerlatseqatigiiffiup tamanna akisussaaffik aamma akueraa.
Atuaruk: Naalakkersuisooqatigiinnik uppititseratarsinnaavoq
Inatsisitigut piumasaqarsinnaaneq
GME-p avatangiisinut, peqqissutsimut, isumannaallisaanermut allanullu piumasaqaatit naammassissagunigit, piiaanissamut akuersissummik inatsisitigut tunngavilimmik pissarsinissamut qanittuararsuusoq, Jens-Erik Kirkegaardip (S) illuanik nalilerpaa.
Naalakkersuisoqatigiit nutaat pilersinneqarnerisa kingorna GME-p aktiaataat 20 procentimik appariaateqarput. Taamaattorli Kinamiut Shenghep ingerlatseqatigiiffimmut aningaasaliinngikkallarneranit suli maanna annertunerupput.
Atuaruk: Naalakkersuisooqatigiilersut uranimut aalajangiinissaq kinguartippaat
Sermitsiaq.AG-p aatsitassanut naalakkersuisoq Múte Bourup Egede (IA) oqaaseqartinniarlugu sulissutigaa.