tapiisarnerit
Tusagassiivinnut tapiisarnerit ilumut kiffaanngissuteqartitsisarnersut Aleqap qularaa
Kikkut tamat oqartussaanerat ataqqiniarlugu tusagassiiviit aningaasanik tapiisarnerit unitsinneqartariaqartoq Naalakkersuisut siulittaasuat oqarpoq
Aviisit Naalakkersuisunit tapisiaqartinneqartarnissaat piumasaqaataanngilaq.
Naaja Nathanielsenip Inuit Ataqatigiinneersup paragraf 37 naapertorlugu apeqqutaani Naalakkersuisut siulittaasuat Aleqa Hammond Siumumeersoq akissuteqarpoq.
Tusagassiivik Sermitsiaq.AG Naalakkersuisunit tapisinissamut itigartinneqartareerpoq. Qinnuteqaatit kingusinaarluni nassiunneqarsimasut Aleqa Hammond erseqqissaavoq. Tapisisoqassanersorli sivisuumik suliarineqarpoq.
- Sermitsiaq.AG-ip aningaasatigut ingerlalluarnera ukiullu kingulliit arlaqartut sinneqartooruteqartarsimanera eqqarsaatigaarput. Taamaalilluni tamatuma kinguneraa aviisip ingerlaannarnissaata tungaanut qulakkeernissaanut innuttaasut akileraarutaannik atuinissap pisariaarunnera, Naaja Nathanielsenip apeqqutaanut Aleqa Hammond akissuteqarpoq.
- Naalakkersuisuutitaqartunit tapiissutigineqartut tamat oqartussaaqataanerannut qanoq sunniuteqassanersut Naalakkersuisut naalagaaniarfigissanngilaat, oqaatigiinnarusullu gulu tapiissuteqarnissaq pisariaqarunnaaraangat kikkunnut tamanut pitsaanerpaamik ineriartuutaasarmat aviisimut suliffeqarfittut aammalu tamat oqartussaaqataanerannut, Aleqa Hammond oqarpoq.
Aningaasanut inatsimmi 2014-moortumut Tusagassiisarfik Sermitsiaq.AG taperneqartussanut ilaavoq. Kingusinnerpaamik januaarip arfineq pingajuanni qinnuteqartoqariissaaq, piumasaqaataaginnarporlu nuna tamakkerlugu kalaallisut qallunaatullu saqqummertarnissaa.
Tusagassiiviup Sermitsiaq.AG-ip pisortaata Poul Krarupip Aleqa Hammondip oqaasiinut isumaqataanngilaq.
- Qallunaatut kalaallisullu saqqummertoqarnissaanik piumasaqaat atuupparput. Naalakkersuisut atorfilittaalu nutaanik piumasaqaatilersuilissappata kiffaanngissuseqannginnerput erserpoq. Sermitsiaq.AG-imit iliuutsit ingerlanneqartartut nikeriarnikuunngillat. Qinnuteqarnermi nutaanik piumasaqaatilortoqalissappat Aleqa Hammond eqqortumik oqalunneranik isumaqatigisinnaavara, politikkikkummi attuumassuteqarusunngilagut, Poul Krarup oqarpoq.