appileqaat
Tusaamasat aliannaalerput
Ilulissat rock’n rollimiki nipilersortartutoqaat Siko ukiunik 40-nngortorsiorput
Aliannaartoqangaatsiassagunarpoq nipilersoqatigiit Siko arfininngornermi unnukkut Ilulissani kulturip illorsuani Sermermiuni tusarnaartitsilerpata. Erinnat atugassat allattorneqanngillat tamannalu nipilersoqatigiit ingerlanerminni aamma atorsimanngilaat.
Kulturip illorsua Sermermiut Sikokkut arfininngornermi unnukkut aliannaarnissaannik aaqqissuisuuvoq.
Nipilersoqatigiit siuttuat Karl Jørgensen aamma pattattuat Jakob Leander Qasigiannguani Aasiannilu najugaqarput. Maannalu tassa illoqarfitoqqaminni aliannaassamaalerput.
- Pissangalaarpunga ukiut arlallit kitaarernikuunnginnama talikkut aqqunarnerma kingorna. Ajorunnanngilarmiaasit, Karl Jørgensen Sermitsiaq.AG-mut oqarpoq.
Sungiusarneq ajorput
Hotel Jakobshavneqarallarmat Sikokkku tassani nipilersortuusarput ilaatigut unnuup ingerlanerani akunnerpaaluit appisimaartarlutik. Atugaasa ilisimaneqarnerit ilagaat ’Ilulissanaa’ illoqarfimminnut nersorinninniutitut sanaavat taannalu nutarterlugu Disco Bay Bluesikkut aamma atortarpaat.
Nipilersoqatigiit piffissami sivisuumi sungiusaqatigiissimanngillat. Taamaattoq nipilersoqatigiit kassettenik arlalinnik saqqummersitsereersut ernumanngillat. Aamma erinnat atugassatik allattugaatiginngilaat.
- Hotel Jakobshavnimiikkallarattali tamanna periuserinngilarput. Arlaat eqqaallugulu appiinnartarparput, Karl Jørgensen oqarpoq.
Sermermiuni tusarnaartitsineq arfininngornermi unnukkut quliniit unnuakkut ataatsip missaata tungaanut ingerlassaaq.
Sikokkut tassaapput: Karl Jørgensen erinarsorlunilu kitaarertoq, Iisaannguaq Cortsen kitaarerlunilu erinarsortoq, Jakob Leander pattattoq, Ole Hansen qatitoortoq kiisalu Ejner Iversen tumerparpaartoq.