Nuuk-casting
Tusaamasaarusuppit?
Sapaatip akunnerata naanerani Aka Hansenip filmiliaanut nutaamut inuttassattut misilitsissinnaavutit.
Kalaallit qallunaallu nangeqattaartuliaannik immiussinissamut filmiliornermi ingerlatsisoq Aka Hansen aamma ilitsersuisoq Natalia Ciepel isiginnaartitsisartunik ujaasinerminni ammasumik misilitsitsiniarput.
- Inuusuttunut isiginnaagassiamut nangeqattaartumut, POLAR, inuttaaffissat pingasut pingaarnerit inuttalernissaat siunertaraarput. Isiginnaartitsinermik misilittagaqareernissamik piumasaqaateqanngilaq, Natalia Ciepel, tusagassiuutinut nalunaarummi oqaluttuarpoq.
Atuaruk: Filmiliassaq Nuummi inuttassarsiorneqassaaq
Inuttaq siulleq angutaassaaq kalaaleq, 16-it 23-llu akornanni ukiulik. Taanna 17-it 20-illu akornanni ukioqartutut isikkoqqarsinnaassaaq, kalaallisullu oqalussinnaasariaqarluni.
Inuttap aappaa angutaassaaq qallunaatut isikkulik, 16-it 23-llu akornanni ukiulik. Taanna 17-it 20-illu akornanni ukioqartutut isikkoqqarsinnaassaaq, qallunaatullu oqalussinnaassalluni.
Inuttat pingajuat arnaassaaq 35-it aamma 60-it akornanni ukiulik. Kalaallisullu oqalussinnaassaaq.
Atuaruk: Kalaallit kinaassusaannik filmeeraliaq 3.000-t sinnerlugit takuneqarpoq
Immissinerit ukiormanna Nuummi apriilimi pissapput, nangeqattaartuliarlu oktobarimi takuteqqaarneqassaaq.
- Sapinngitsut piumassusillillu tamarmik, misilittagaqarneq apeqqutaatinnagu aggerlutik naapikkumaaraatigut neriuutigaarput, Aka Hansen oqarpoq.
Inuttassarsiorneq sapaatip akunnerata naanerani arfininngorpat januaarip arfineq-aappaanni nalunaaqutaq 17.30-miit 20.00 tungaanut Nuup Eqqumiitsuliornermut Katersugaasiviani pissaaq.