Danmark
Tusa aallarteqqissaaq
Kalaallit Danmarkimi peqatigiiffiisa kattuffiata Inuit, arfininngorpat apriilip 30-anni erinarsoqatigiinnik erinarsortartunillu unammisitsineq aallarteqqissavaa
Arfininngorpat apriilip 30-anni kalaalerpassuit Horsensip eqqaani Brædstrupimi, Hotel Pejsegaardenimi, erinarsornermik nipilersornermillu nuannisaqatigiinnermi naapisimaassapput.
Kattuffiup Inuit ukiuni 42-ni oqaluttuarisaanerani ´Tusariarlinngooq´ ukiumoortumik ingerlanneqartarsimavoq. Uggornaraluartumilli aaqqissuussaq nuannisaqatigiittarfik ukiuni marlunni, 2014-imi 2015-imilu, ingerlanneqarsinnaasimanngilaq aningaasassaaleqineq pissutigalugu. Maannali tassa ingerlanneqaqqilerpoq.
Imminnut unammisarput
Tusa tassaavoq erinarsoqatigiit kisimiillutillu erinarsortartut naapisimaaqatigiittarfiat, tassani Danmarkimi kalaallit peqatigiiffii imminnut unammisarlutik, tamatumalu kingorna nuannisaqatigiittarlutik, nereqatigeeriarlutik qittannermik naggaserlugu.
Ukioq manna erinarsoqatigiit arfineq-pingasut kisimiillutillu erinarsortartut sisamat unamminermi peqataaniarlutik nalunaarsimapput, tamakkualu dommereqatigiinnit nalilerneqartassapput.
Nipilersortartut kalaallit
Tusa nalunaaqutaaq 14.00 aallartinneqassaaq, kalaallit peqatigiiffiisa 23-t, kattuffimmut Inuit ilaasortaasut, isaaqatigiinnerisigut.
Nereqatigiinnerup kingorna Nikolaj Løvstrøm qititsilluni appisimaassaaq. Aamma kalaallit nipilersoqatigiit Qulleq appisimaassapput, peqataasullu Danmarkimi sumut tamaanga angerlagaalinnginneranni ataatsimoorluni ´Ulloq Naavoq´ erinarsorneqassaaq.
Assit marluk ataani takukkit