Tupaarnaq nunat assigiinngitsut akornanni tusaamasanngulersoq

Sapaatip akunnera atuakkiortumut Mads Peter Nordbomut ulapaarfiusimaqaaq.

Sisamanngormat atuakkiaa 'Niviarsiaq ameqanngitsoq' (Pigen uden hud aaqq.) saqqummerpoq tamannalu aviisini, naliliisartunit tusagassiorfinniillu sammineqarluarpoq.

- Nuannersorpassuarnik nuannerpianngitsunillu nalaataqarpunga, atuakkiortoq Sermitsiaq.AG-mut oqarpoq.

Tunisaalluartoq
Qanoq amerlatigisut tunineqarsimanersut suli pisortatigoortumik saqqummiunneqanngillat, taamaattorli atuagaq tunisaalluarsimaqaaq immikkoortullu aappaa saqqummersinneqangajalerluni.

Atuagaq nunani allani atuakkanik saqqummersitsisarfinnit nuannarineqarluarpoq. Atuakkami quppernerit 75-it nutserneqareerneranni atuagaq nunanit 16-init pisiarineqareersimavoq. Aamma Tysklandimi atuakkanik saqqummersitsivinnit arlalinnit pilerngunneqarsimavoq.

- Taamak soqutigineqartiginera upperiuminaalaarpoq. Atuakkanut danskisut saqqummersinneqartartunut taamatut pisoqartarnera qaqutigoorpoq, Mads Peter Nordbo oqarpoq.

Atuakkap nunani allani taamak soqutigineqartiginera nassuiaatissaqartinngilaa. Piffissami eqqortumi eqquilluarneq apeqqutaasarpoq.

Nuuk atuakkami pingaarnertut
Nunatta qanoq isikkoqarneranik pinngortitarsuullu kusanaqisup nassuiarneranik eqquilluarsimagunarpoq.

- Nunami kusanaqisumi najugaqarama iluanaarpunga, taamaammallu pinngortitap peqqarniitsup qanimut atuartunut oqaluttuarissallugu periarfissaqarluarlunga, oqarpoq.

- Nuuk atuakkami inuttaritinneqartutut ippoq.

Saqqummersitsisarfimmit Tupaarnap nukittunera alutorineqartoq
Atuakkami inuttaritinneqartoq tassaavoq danskeq tusagassiortoq Matthew Cave, taanna ilaqutariinni alianartunik pisoqareersoq nunatsinnut qimaavoq. Tassani toqutsisoqarsimaneranik nalaataqarpoq, toqutaasut puisituulli ilumuiarneqartarlutik.

'Niviarsiaq ameqanngitsoq' aamma atuakkami inuttaavoq, tassaalluni arnaq inuusuttoq kalaaleq Tupaarnamik atilik. Taanna meeraanermini kinguaassiuutimigut atornerlunneqartarsimavoq. Taassuma ataatani 15-inik ukioqarluni taamatut toqussimavaa.

- Timaa kakiornerpassuaqarpoq. Amialu meeraalluni nungullarsimalluni. Piumassuseqarnera annertuvoq, soorlu Nuummi qaqqat annertussusersuatut, Mads Peter Nordbop nittartakkamini taamak allaaseraa.

Issittumi pinngortitap saniatigut saqqummersitsisarfinnit Tupaarnaq immikkut maluginiarneqarpoq.

- Nuannareqaat, Mads Peter Nordbo oqarpoq.

Nuannaringaaramikku atuakkap nanginnera suli allanneqanngitsoq pisiarereerpaat. Mads Peter Nordbo atuakkioqqinnissaminut piareersaasiulereerpoq isumassarsiulereerlunilu.

Filminngortinneqassanerluni?
Qanoq imaqassanera suli saqqummiukkusuppallaanngilaa, Tupaarnalli annerusumik eqqartorneqarnerunissaa oqaatigisinnaallugu.

- Initunerussaaq. Taamaaliortariaqarpasippungami, qungujulalluni oqarpoq.

Pingajussaanik oqaluttualiornissani pilersaarutigereerpaa, nunamullu allamut ataatsimut tunereersimallugu. Sumut tunnganissaa Mads Peter Nordlund suli nalugallarpaa, inuttaasulli ilaatinneqarnissaat ilimanarsinnaavoq.

'Niviarsiaq ameqanngitsoq' tuniniaavissuarmi Hollywoodimiittumi inissisimalereerpoq, imaassinnaavorlu Matthew Cave Tupaarnarlu filmiliarineqartut.

Taamaattoqassappallu Tupaarnaq Lisbeth Salanderisuulli tusaamasanngorsinnaassaaq. Tamannalu Mads Peter Nordbomut tulluusimaarnassaaq.