Tupaallatsitsinngitsoortoq
Partii Naleqqap Hans Enoksen siuttoralugu immikkut ittumik tusagassiortunik katersortitsinermi Partii Inuimmi siulittaasuusimasoq Nikku Olsen, Partii Naleqqami qinigassanngortinniarnera saqqummiuppaa.
Taamaasilluni Aleqa Hammondip Hans Enoksenip partiia sinnerlugu qineqqusaarnissaanik eqqarsaatersuusernerit, tunngavissaarupput.
Isertukuluttumik tusagassiuutinut nalunaarut
Tusagassiortunik katersortitsinnginnermi Partii Naleraq isertukuluttumik “politikkikkut suleqatigiissitsisut nukiit katunnissaat” oqaasertaliullugu “siuttuusullu ataatsimoorlutik suleqatigiilernerarlugit” tusagassiuutinut nalunaaruteqarpoq.
Nikku Olsen siusinnerusukkut Inuit Ataqatigiinni siuliersuisunut ilaasortaasimavoq, 2009-imili tunuarluni Partii Inuit pilersillugu. 2013-imi qinersisoqarmat partii marlunnik isertitaqarpoq, tassani Siumut Atassullu naalakkersuisoqatigiinnermik isumaqatigiissuteqarfigineqarput, ineqarnermut, pinngortitamut avatangiisimullu naalakkersuisoqarfik taamaanikkut taama taaguuteqarsimasoq, pissarsiaralugu.
Qinersinerullu kingorna, Nikku Olsen 2005-imi nakuusersimanini pissutigalugu qinigaatitaasinnaajunnaarsinneqarpoq, qinigaanngitsoorninilu narrujuummissutigalugu.
Nikku Olsen peersitaasoq
Taamani Partii Inuit Siumut Atassullu naalakkersueqatigiinnissamik isumaqatigiissuteqafigaat, naalakkersuisoqataanerli qaammatini arfineq-marluinnarni pivoq, partiimi uranisiornissamik isumaqataannginnera pissutigalugu naalakkersuisoqatigiinnit peersinneqarput.
Ulloq 28. november 2014-imi qinersisoqarmat Partii Inuit 1,6 procentimik qinerneqarput, tamannalu qinigaatitaqaqqinnissamut naammanngilaq.
Nikku Olsen namminiilivinniartuni inissisimavoq, politikkimillu suliaqarnermini danskisut oqaaseqarusuttarsimanani. Taassuma partiimi siulittaasuuffini juuni 2015-imi qimappaa.