Tunu: Uagut aamma amerlanernik qilalugartassaqarusuppugut
Sapaatip-akunnerata siuliani qilalukkat qernertat pisassat Nunatta avannaata kitaani amerlivaat, maanna aamma Tasiilami atsiornernik katersuisoqaqqammerpoq, Tunumi pisassiissutit amerlineqarnissaat kissaatigineqarluni.
Qimusseriarsuarmi aamma Qeqertarsuup Tunuani piniartut, sapaatip-akunnerata siuliani piffinni taakkunani immikkut qilalukkanik qernertanik pisassiissutit 20-nik ilaneqarput. Tasiilami innuttaasut Piniarnermut Naalakkersuisumut ataasinngormat allakkamik 136-nit atsiorneqarsimasumik nassiussiput, ukioq manna qilalugartassiissutit kissaatigalugit.
Piniartoqarfiit
- Tasiilaq eqqaanilu nunaqarfiit tallimat tamarmiusut piniartoqarfiupput annerusumillu suliffissaqarfiunani akissassaaleqinerlu atuuppoq, Knud Mathiassen, atsiornernik katerseqataasoq, Tasiilami Inuit Ataqatigiit immikkoortoqarfianeersoq allappoq.
- Juulli nalliutilerpoq piniartut ilaqutaallu annerusumik inuussutissaqanngillat, taamaattumik ukioq naatinnagu Naalakkersuisut piaartumik iliuuseqaqquagut, taanna allappoq.
Knud Mathiassenip oqarnera naapertorlugu, ulluni makkunani piffissami sivitsortumi Tasiilap eqqaanilu qilalukkat akulikitsumik angallatit siumoqattaarpaat.
Neriorsuuteqarsinnaanngitsoq
Nikkulaat Jeremiassenip naalakkersuisutut allattaa Sermitsiaq.AG-p attaveqarfigaa, Tunumi atsiornernik katersineq Naalakkersuisut qanoq qisuariarfiginiarneraat paasiniarlugu. Naalakkersuisup allattaa Piniarnermut Naalakkersuisup KNR-ip aallakaatitassiaani ippassaq Puilasumi apersorneqarneranut innersuussivoq.
Tunumi qilalukkat qernertat pisassiissutigineqartut amerlineqarnissaanut periarfissat oqaluuserisimagaat, Nikkulaat Jeremiassen KNR-imut ilisimatitsivoq, kisianni pisassiissutit amerlineqarnissaat tulluartuusorisimanngilaat.
- Naalakkersuisut oqaluusereqqissinnaavaat, kisianni maannakkut neriorsuuteqarsinnaanngilanga, Piniarnermut Naalakkersuisoq KNR-imi Puilasumut taama oqarpoq.