UNESCO

Tunup ilisarnaataa UNESCO-mi allattorsimaffimmut ilanngunneqarusuttoq

Piniartut inooriaasiat UNESCO-p nunarsuarmiunut kingornuttagassatut ilaasariaqartoq Asii Chemnitz Narup (IA) isumaqarpoq.

Piniartut inooriaasit UNESCO-p nunarsuarmiunut kingornuttagassatut ilaasariaqartoq Asii Chemnitz Narup (IA) isumaqarpoq.

Tunumi piniartut inooriaasiat nunarsuarmioqatigiit kingornuttagassaattut toqqarneqarnissaminut naleqquppoq. Kommuneqarfik Sermersuumi politikkerit pingasut taama isumaqarput: Asii Chemnitz Narup (IA), Justus Hansen (D) Vittus Mikaelsenilu (S).

Taamaammat Tasiilap eqqaanilu piniartutut inooriaaseqarneq UNESCO-llu nunarsuarmiunut kingornuttagassatut ilanngunneqarsinnaaneranut periarfissat kommunalbestyrelsep misissorneqassasoq siunnersuutigaa.

- Tasiilaq immikkuullarilluinnartuuvoq. Piorsarsimassutsimullu tulluulluinnartumik avatangiiseqarpoq piniarniarfissaqqissuullunilu. Tamannalu unarsuarmioqatigiit kingornuttagassaattut naleqarluarluni, Tunumi piniartutut kultureqarneq nersorneqarniartariaqarneranut politikkerit ataatsimoorussisut ilaatigut allapput.

- Kalaallit Nunaat nunallu avannarliit immikkuullarissunik avatangiiseqaraluartut piniartoqarfiullutillu, tunumi piniartut inooriaasiat Tasiilallu sineriaata ilaani immikkuullarissuuvoq. Tamannalu nunarsuarmiooqatigiit kingornuttagassaannut ilanngunneqarnissaanut tulluarluinnarpoq, politikkerit pingasut siunnersuumminni Kommuneqarfik Sermersuup kommunalbestyrelsianut akuerineqartumit allapput.

UNESCO-p nunarsuarmiunut kingornuttagassatut allattorsimaffianut akuerineqassagaanni qinnuteqartoq UNESCO-p tunngaviusunik qulinik piumasaqaatigisai naapertorneqartariaqarput. Inuit akornini ataqatigiinnerannit, pinngortitap avatangiisilluunniit ineriartornermit ulorianartorsiortinneqalersimasunut allattorsimaffimmiitsinneqalersinnaasarlutik.

Piniartoqarfiit silap pissusiata allanngoriartornerani ilungersunartorsiorput nutaaliaanerusumillu inooriaaseqartariaqalersarlutik.

- Tasiilaq sineriaalu suli piniartoqarfiuvoq ilungersunartorsiorlutilli. Ineriartornerullu tamanna siunissami sunneriaannaavaa, Asii Chemnitz Narup (IA), Justus Hansen (D) Vittus Mikaelsenilu (S) erseqqissaapput.

Atuaruk: UNESCO-mut qinnuteqaatissaq alla piareersarneqarpoq

Nunarsuarmiooqatigiit kingornuttagassaattut toqqanneqarneq illersorneqarnermik isumaqanngilaq. Taamaattoq akuersaarneqartutut immikkuullarissutullu isigineqarnermik tunngaveqartuulluni.

Kujataani nunaateqarfik allattorsimaffimmiilissasoq UNESCO-mut ukioq manna aamma qinnutigineqarpoq.

Qinnuteqaat ukiuni qulini suliarineqartoq aappaagu UNESCO-p sumiiffiit allattorsimaffiimmiilernissaannik aalajangersaappata aalajangiiffigineqassalluni. Qeqqata Kommunia aamma allattorsimaffimmiilernissaminut piukkoorpoq. Sermersuaq sinerlugu tuttunniarfiusartoq kangerluk qeqertallu inoqarfiisarsimassut allattorsimaffimmiilertikkusullugit. Inuit oqaluttuarisaanermi ukiut 4.500 ingerlanerini eqqaassutissaat.

Nunarsuarmiooqatigiit kingornuttagassaanni Ilulissani sermermiut Nunatsinni siullersaalluni 2004-mi allattorsimaffimmiilerpoq.

Qinnuteqaallu qaammatini pingasuni sisamaniluunniit suliarineqassasoq Kommuneqarfik Sermersuumi kommunalbestyrelsip naatsorsuutigaa.

Powered by Labrador CMS