Uuliasiorneq
Tunup Avannaarsuani avatangiisini ilisimasassarsiornissamut pilersaarut aallartilerpoq.
Pilersaarummi sumiiffimmi uuliamik misissuinissamut pilersaarutit malittarisarissallu qanoq iliorluni pitsanngorsarneqarsinnaanersut paasiniarneqassaaq.
Tunup Avannaarsuani avatangiisini ilisimasassarsiornissamut pilersaarut aallartilerpoq.
Pilersaarummi suliat 20-t ingerlanneqassapput. Pilersaarummi sumiiffimmi uuliamik misissuinissamut pilersaarutit malittarisarissallu qanoq iliorluni pitsanngorsarneqarsinnaanersut paasiniarneqassaaq, Namminersornerullutik Oqartussat, tusagassiuutinut nalunaarumminni paasissutissiivoq.
- Pilersaarummi nunani tamalaani ilisimatusartunit siuttuusunik atuisoqassaaq. Kalaallit Nunaanni, Danmarkimi, Norgemi aamma USA-mi ilisimasassarsiorfiit arlallit peqataatinneqassapput, suliassallu assigiinngitsorpassuit, imaani silaannarmilu ingerlanneqartussat suliarineqassapput, Namminersornerullutik Oqartussat allapput.
Sumiiffiup iluani sumiiffiit suut uumassusillit ataqatigiinnerinut immikkut pingaaruteqarnersut nalunaarsuiffiusunik suliassaqassaaq. Taakku sumiiffiit immikkut ittumik illersortariaqarnerinut ilisimasassanik pingaarutilinnik pissarsiviusinnaapput.
Uuliaarluertoqarpat akiuiniarnissaq
Suliani allani akuutissanik avatangiisinut iluaqutaanngitsunut nungutitsiniaanermi periarfissanit paasisat annertunerulernissaat siunnerfigineqarpoq. Tamatumani avannaarsuani imaani uuliaarluertoqarpat akiuiniarnissaq siunertarineqarpoq, Namminersornerullutik Oqartussat paasissutissiipput.
Uuliasiorfiit Kalaallit Nunaanni misissuinissamik aammalu uuliamik gassimillu atuinissamik kisermaassinissamut akuersissutinik pigisaqartut, Kalaallit Nunaanni uuliasiornermi gassisiornermilu avatangiisini pissutsinik ilisimasaqalernissamut tapiissuteqarnissaq pisussaaffigaat. Aningaasat taakku Aatsitassarsiornermut Aqutsisoqarfinnit aqunneqarput.
- Iisimasassarsiornissamut pilersaarut pillugu isumaqatigiissut, 60 millioner koruunit missaannik aningaasartaqartoq akuersissutinik pigisaqartut Aatsitassarsiornermullu Aqutsisoqarfiup, aammalu Aatsitassarsiornermi Avatangiisinut Aqutsisoqarfiup akornanni isumaqatigiissutaavoq, Namminersornerullutik Oqartussat oqarput.
Aatsitassarsiornermi Avatangiisinut Aqutsisoqarfimmi siunnersortit, Pinngortitaleriffik aamma Aarhus Universitet-imi Nationalt Center for Miljø og Energi nunami namminermi nunanilu tamalaani suleqatit suleqatigalugit suliamik ingerlatsissapput.