Tasiilaq
Tunumiut nammineq kommuuneqarusupput
Tunup nammineq immikkut kommuuniulernissaannut kissaateqarluni atsiornernik katersisitsineq Tasiilami ingerlanneqaleruttorpoq. Pilersaarutaavoq aamma Kommuneqarfik Sermersuup illoqarfiini allani atsiornernik katersisoqarnissaa
Tunumiut nammineq kommuneqarusupput. Kommuneqarfik Sermersuumit anerusupput.
Maannamut taama kissaateqartut 300-nit sinneqartut atsiornermik katersisitsinermut atsioreersimalerput.
Atsiornernik katersisoq tassaavoq tasiilarmiu Egon Poulsen. Taassuma atsiornernik katersinini sapaatip akunnera kingulleq aallartippaa. Taannami tunumiullu arlallit isumaqarput tunu nammineq immikkut kommuniusariaqartoq.
- Tunumiut arlallit isumaqarput kommunit kattunneqarnerat kukkunerusoq. Taamaammat arlalinnit kajumissaarneqareerlunga atsiornernik katersineq aallartippara, Egon Poulsen Sermitsiaq.AG-mut oqarpoq.
Maannamut tasiilarmiut 300-nit sinneqartut Kommuneqarfik Sermersuup avinneqarnissaa kissaatigalugu atsioreersimalerput.
Kommuneqarfik Sermersooq sulisuminik 75-inik kommunit akornanni naligiissaarinermut iluarsartuussinerugallartussaq pissutigalugu soraarsitsisussaavoq. Kommunimmi akornanni naligiissaarinermut iluarsartuussinerugallartussaq, maannali unitsikkallarneqartoq, Kommuneqarfik Sermersuumut 140 million koruuninik aappaagumut naleqariaannaammat.
Tunumiut: Kalaallit Nunaanni kitaamiut kangiamiullu saammaasseqatigiittariaqarput
Læs: Sermersooq fyrer 75 medarbejdere
Tasiilami sulisut qulit tikillugit soraarsitaalersut
Sulisunillu 75-init soraarsinneqartussanit qulit tikillugit Tasiilami, atuarfeqarnikkut sanaartornikkullu kommuunit kattussuutereerneranni eqqornerlunneqareersimasumi, soraarsinneqartussaapput.
- Kommuunit kattussuunneqareerneranni Tasiilami innuttaasut sullinneqarnermikkut ajornerusumik inissisimalerput, suliammi tamangajammi maanna Nuukkooqqaartalermata, Egon Poulsen oqarpoq imalu nangilluni:
- Aamma maluginiarpara meeqqat atuarfimmit friiginnartalersut ilinniartitsisumik napparsimasoqartillugu. Kommuunimmi aamma vikarinut sipaarniarnikuummmat.
- Ammassalik Kommune atorallamat Tasiilaq sanaartugassaqarfiunerugaluarpoq maannamut sanilliullugu. Aamma Illoqqortoormiuni taama ippoq, Egon Poulsen oqarpoq.