Sermersooq
Tunumiut kulturiat malunnartinneqarpoq
Sapaatip akunnerani 23-imi Kommuneqarfik Sermersuumi Tunumiut kulturiat malunnartinniarneqarpoq
Sapaatit akunnerisa 23-anni ullut tamarluinnaasa ilaatigut saqqummersitsisoqartassaaq, oqaluttuartoqartassaaq, qilaatersortoqartassaaq filmertitsisoqartarlunilu.
Kulturikkut aaqqissuussineq pissaaq Nuummi, Paamiuni Tasiilamilu. Tunumiut kulturiat pillugu malunnartitsiniaaneq pilerpoq, politikkikkut kissaateqartoqarmat tunumiut kulturikkut pisuussutaat annerusumik ersarissarneqassasut.
Aaqqissuussineq ataavartussaq
Ukioq manna kulturikkut sapaatip akunneqartitsisoqarnissaa tassaavoq, ukiut tamaasa pisartussamik Tunumiut kulturiannik malunnartitsinerup aallarnernera. Ukioq manna Nuummi pilersaarut malillugu Tunumiut eqqaanilu atisat, oqaluttuatoqqat, oqaluttuaatit allarpassuillu pillugit tusarnaarnissamut periarfissaqartitsisoqassaaq.
Siullermeerluni 2011-imi Nuummi Tunumiut kulturiat pillugu sapaatip akunneqartitsisoqarpoq, 2015-imilu upernaakkut aalajangiunneqarpoq tamanna aallarteqqinneqassasoq, kommunimilu illoqarfinnut allanut aamma siammarterneqassasoq. Ukiut tamaasa tamanna ingerlanneqartalissaaq.