kommuninut qinersineq 2017
Tunumit qinigaatitaqarluartut
Kommuneqarfik Sermersuumi kommunalbestyrelsimi arfinilinnik ilaasortaatitaqarluni Tunu ilaasortaatitaqarluarpoq
Tasiilami aamma Ittoqqortoormiini qinersisartut nunaqqatititik taaguunnerusarpaat.
2013-imi qinersisoqarnerani siullermik qinigassanngortittut tallimat qinigaapput. (Kingusinnerusukkut ataaseq qinigaasinnaanngitsutut nalunaarutigineqarpoq).
Maannakkullu arfinillit qinigaapput.
Tasiilamit Ittoqqortoormiinillu kommunalbestyrelsimut ataatsimik ilaasortaatitaqarnissaq qulakkeerneqarpoq.
Ittoqqortoormiini Rolf Pike Siumumeersoq qinigaavoq. Kisianni amerlasoorsuarnik taaguunneqarnermigut qinigaanngilaq.
Pingasut qinigaalluarnerpaani qulini ilaasut
Qinigassanngortittut tallimat Tasiilameersut qinigaapput. Mala Høty Kúko Atassummeersoq 269-nik taaneqarluni taaguunneqarnerpaavoq, Siumumeersoq Laura Táunajik 221-nik taaneqarluni tulliuvoq.
Atuaruk: Tunumi nammineq sassartitat qinerneqartarput
Tasiilamit qinigassanngortittut pingasut kommunimi taaguunneqarnerpaat qulit akornanniipput, tassami aamma Justus Hansen taaguunneqarluarami.
Ittoqqortoormiini Siumut siuariarujussuartoq
IA-p Harald Bianco aamma Knud Mathiassen Tasiilamit qinigaatippai, Partii Nalerarlu partiini kisiartaalluni Tunumit qinigaatitaqanngilaq.
Partiip kingullermi qinigassanngortitsinerata killormoortuanik Siumut Ittoqqortoormiini iluatsitsivoq. Tassani Siumut 12,7 procentiminngaanniit 58,1 procentimut siuariangaatsiarpoq.