Tunumi isumaginninnikkut nukittorsaanissamut piareertut
Isumaginninnerup iluani siunnersuinermi ikiortitut ilinniagaqalersut qulit Tasiilami Ittoqqortoormiinilu sullissineq nukittorsarsinnaavaat
Siunnersuinermi ikiortitut ilinniarsimasunngorlaat qulit suliassat pingaarutilerujussuusut oqaatigineqarsinnaavoq. Tunumi sullissisunik amigaateqarneq ukiorpassuarni annertullunilu aaqqinneqarsimanngilaq.
Maanna siunnersuinermi ikiortit sassarsinnaanngorput. Tasiilami nunaqarfiinilu kiisalu Ittoqqortoormiini isumaginninnermi sullissisut allallu isumaginninnerup iluani suleqataasut siunnersuinermi ikiortitut ilinniakkaminnik naammassinneqqammerput.
Taakkunannga tallimat meeqqanut inuusuttunut ilaqutariinnullu tunngasuni ilinniagaqarput, allallu tallimat inersimasunut tunngasunut.
Qulingiluat Tasiilami aamma nunaqarfiineerput, kiisalu ataaseq Ittoqqortoormiinit. Siunnersuinermi ikiortinngorniarnermi ingerlaviit immikkoortunut marlunnut sammiveqarput, tamarmik immikkoortukkuutaanut sisamanut avinneqarsimallutik. Ilinniarneq ukiumik ataatsimik sivisussuseqarpoq.
Siunnersuinermi ikiortinngorlaat ataatsimoorlutik immikkoortukkuutaat siulliit marluk ingerlassimavaat, kingorna namminneq toqqaasimallutik ingerlaqqiffissaminnik. Sammivik ataaseq inersimasunut isumaginninnermut tunngasuuvoq, allalu meeqqanut-, inuusuttunut- ilaqutariinnullu tunngasuulluni.
- Nuannaarutigisorujussuuara, Kalaallit Nunaatsinni upernaaq manna illoqarfik qimannagu ilinniarsimasunik 28-nik isumaginninnermi siunnersorteqalernikuugatta, taakkulu saniatigut siunnersuinermi ikiortinik qulinik amerlillutik, isumaginninnermunt naalakkersuisoq, Anthon Frederiksen taama oqarpoq.
- Immikkullu nuannaarutigaara tamarmik Tasiilamiit nunaqarfiiniillu, kiisalu Ittoqqortoormiiniit aggersuummata. Tassani takussutissatsialaavoq qanoq Naalakkersuisut ilinniartoqarfinnik suleqateqarnersut immikkut Tunumut sammisumik.
Ilinniagaq isumaginninnermi siunnersortitut najugaq qimannagu ilinniarnissamut periarfissaqalersitsivoq.
Ilinniarneq Kalaallit Nunaanni Siunnersuinermi ikiortinik qulinik peqalersitsisoq, Isumaginninnermi Inatsisinillu Atuutsitsinermi Naalakkersuisoqarfimmit aningaasalersorneqarsimavoq.