takornariat
Tunumi akunnittarfiutilik iluatsitsilluartoq
Island aqqusaarlugu takornarianik Asiameersunik amerlanerusunik tikisitsisalernissamik iliuusissamik pilersaarusiorneq, Mike Nicolaisenimut akunnittarfiutaanullu iluatsitsiffiuvoq
Tunumut takornariat 2.500-t ukiumut tikittartut affaat Arctic Wonderland Toursip sullittarpai.
Suliffeqarfiup ukiuni qulini kingullerni toraagalimik suliniuteqarnermigut Asiamiut niuerfigalugit iluatsissamanera minnerunngitsumik tamatumunnga pissutaavoq. Asiameersullu ingerlatseqatigiiffiup takornariartartuisa tallimararterutaasa missaaniipput, taakkulu amerliartorput, Børsen allappoq.
- Uagutsinnut nuannersorujussuuvoq. Asiamut tunisaqarnerput aallartissimanngikkaluarutsigu, piffissaq aningaasaqarnikkut ajornartorsiorfik ajorsimassagaluarpoq. Tamannalu qaangerparput annikitsumik siuariaateqarluta, Asiami tunisaqarnerput iluaqutigalugu, pisortaq Mike Nicolaisen aviisimut oqarpoq.
Islandimi attaveqarfiit agentit aqqutigalugit suliffeqarfik Kinamiut aamma Taiwanimiut angallannermut niuernerannut saaffiginnittarpoq.
Suliffeqarfik qulimiguulimmik timmisartuutilik
Iluatsitsilluarnerup kinguneraa, Mike Nicolaisen ilaquttanilu katillugu 17 millionit koruuninik suliffeqarfimmik qulimiguulimmik timmisartuutilimmik angallatinullu aningaasaliisinnaanngornerat.
Taakku takornariat angalanisssamut piumasaat naammassiniarlugit, ilaatigut heli-skiingerneq. Siuariarnermullu pissutaanerpaavoq, Islandimut angalanissamut attaviit pitsaanerulernerisigut Kalaallit Nunaat tikikkuminarnerulermat.