Aalisarneq

Tunuartitseqqissut aaqqissuisup akissuteqarfigaa

Royal Greenlandip aviisi naqitaq Sermitsiaq naveerpaa ajortumik pineqartutut misigisimagami

Kalaallit Nunaanni 800-t missaannik sulisoqarpoq Royal Greenland

Tallimanngormat aviisip naqitap Sermitsiap oqaluttuaraa, Royal Greenland Pelagicimi inuttat atorfinitsitaanermut isumaqatigiissummik iluameersumik tunineqarneq ajortut, taamaallaalli pappiaqqamik ikittuinnarnik titarnilimmik tunineqartartut.

Ulloq taanna aalisarnermik selskabi tunuartitsissutitut taasamik nassiussivoq, tassuuna aviisimi tusagassiortoq tusagassiornerluttutut unnerluutigalugu.

Tusagassiornerluttoq

Royal Greenlandip attaveqarnermut immikkoortoqarfianit oqaaseqaammi inummit atsiorneqanngitsumi ilaatigut allassimavoq:

– Royal Greenlandip taama qarsupiinnartigisumik tusagassiorneq sakkortuumik uparuassavaa, allaaserisamut paasiniaaneq amigaateqarmat paasiniaanertaqarpasinngingajalluni.

Aalisarnermik selskabi oqarpoq ´atorfinitsitaanermut isumaqatigiissutit nalinginnaasumik atorneqartartut´, taamaattumillu allaaserisaq kukkunertaqartoq.

Ajortisaarisut

Allaaserisarli kukkunertaqanngilaq, aviisip Sermitsiap aaqqissuisua Poul Krarup oqarpoq.

– Nuanninngilaq kattuffiit imarsiortunut inatsiseqalernissamik, inuttat atorfeqarnermi naammaginartunik atugassaqartinneqarnissaannik qulakkeerinnittumik, sorsuutiginninnerat maanna kinguneqarmat tusagassiornermik matumanilu pineqartumi qanoq pisoqarsimaneranik ajortisaarinermik.

Aaqqissuisoq akilluni oqarpoq allaaserisaq allanneqarsimasoq illua'tungeriit tusarniareerlugit.

Pineqartoq eqqarsaatigalugu, tassa atorfinitsitaanermut isumaqatigiissut marlunnik titarnilik, assigiinngitsunik isumaqartoqarsimagunarpoq taanna ilumut atorfinitsitaanermut isumaqatigiissutaanersoq.

Kattuffik uppernarsaavoq

– Sulisitsisup Royal Greenlandip tunuartitseqqussummini, atsiorneqanngitsumi, oqaatigaa pineqartoq tassaanngitsoq atorfinitsitaanermut isumaqatigiissut, Poul Krarup nangippoq.

– Inulli pineqartoq kattuffimminut oqarsimavoq kattuffimmut ilaasortanngorniarami taanna atorfinitsitaanerminut isumaqatigiissutituaralugu. Kattuffiullu tamanna tupigalugu aperimmani atorfinitsitaanermini taanna pappialatuaanersoq taanna angersimavoq.

Tamatuma saniatigut kattuffiup ilisimavaa taamatut assingusumik pisoqartarsimasoq, aviisimi allassimavoq.

Sulisitsisoq oqaloqatigeqqusaanngilaq

Sermitsiap atorfinitsitaanermut isumaqatigiissutitut taaneqartoq Royal Greenlandimut saqqummiussimavaa, isumaqatigiissummik iluameersumik ujartuilluni, aaqqissuisoq oqarpoq.

– Tamanna Royal Greenlandip akisinnaasimanngilaa. Sermitsiap tusagassiortuata sulisitsisoq, inummik pineqartumik atorfitsitsisoq, oqaluukkusunnerusimagaluarpaa, taamaasioqqusaasimanngilarli.

– Akerlianik tusagassiortoq oqarfigineqarpoq Royal Greenlandip atorfinitsitaanermut isumaqatigiissutit naammasseriikkat atortarai. Tusagassiortup apeqqutigimmagu taanna qanoq imaqarnersoq takusinnaanerlugu taamaasinerani takutikkusunneqarsimanngilaq.

Powered by Labrador CMS