ilisarititsineq

Tunniusimallunartup meeqqat atugarliortut sorsuunniarpai

Asanninnermik peqaqaluni nukissaqarluarlunilu Nivé Heilmannip meeqqat inuusuttullu sumiginnarneqartartut suli amerlaqisut ikiorniarpai

NIvé Heilmann februaarip 29-anni Nunatsinnut utissaaq

Kalaallip 39-nik ukiullip Nivé Heilmannip qanittukkut Kalaallit Nunaanni suliffittaamini sulileruni nammineq asannittumik perorsarneqarsimanini atorniarpaa meeqqat inuusuttullu atugarliortut pitsaanerusumik inuuneqalernissaannik ikiornissaannut.

Kalaallit Nunaanni meeqqat inuusuttullu sumiginnarneqartarnerat suli ajornartorsiutaavoq.

ilaatigut meeqqat pingajorarterutaasa ilaquttaat qaninnerpaat imigassamik atornerluisuupput, tamanna takuneqarsinnaavoq Statens Institut for Folkesundhedip kisitsisaani kingullerni, taassumalu 2011-mi nalunaarusiaq ´Det Svære Ungdomsliv´ (Inuusuttuuneq ajornalusoortoq) saqqummiuppaa.

Asaneqarluni peroriartorpoq

Taanna nammineq Kalaallit Nunaanni peroriartorsimavoq, peroriartorninilu oqaatigaa nalinginnaasunut asanniffiusorujussuartullu. Tamanna ingerlateqqinniarusuppaa.

– Nukissaqaqaanga asanninnermillu ulikkaarlunga pitsaasumillu perorsarneqarsimallunga, tamassumalu inuiaqatigiinnut, peroriartorfigisimasannut utertitsinissannik piumassuseqalersippaanga.

– Kalaallit Nunaanni peroriartornikkut Kalaallit Nunaanni kulturi paasisaqarfigisimavara, taamaattumillu nukimma tunniussinnaasamalu ilaat atorusuppakka nunama ikiornissaanut, Nivé Heilmann oqarpoq, taannalu Nuummi inunngorlunilu peroriartorsimavoq.

Blå Korsit

Ikiuiniaqatigiiffittut ingerlatsiviup Blå Korsit Nivé Heilmann meeqqanut inuusuttunullu siunnersortitut atorfinitsissimavaa. Tassani meeqqanik inuusuttunillu nuna tamakkerlugu isumaginninnikkut sulissuteqarnermi peqataassaaq.

Taamaattumik januaarip aallartinneraniilli Danmarkimiissimavoq ikiuiniaqatigiiffik ilinniarniarlugu. Februaarip 29-anni nunatsinnut utissaaq, tamaanilu kattuffiup immikkoortoqarfia Kalaallit Nunaanni Blå Korsit ikiussavaa.

Inuttut assigiimmik naleqassuseqarneq

– Isumaqarpunga Blå Korsit ingerlatsivik aqqutissaasoq nuannerluinnartoq inunnik allanik naapitsinissamut, tassani inuttut assigiissumik naleqassuseqarneq sammineqartuummat. Inuunerup killiffiani assigiinngitsuni inissisimasoqarpoq, isumaqarpungalu tamanna alutornartorujussuusoq.

– Oqiliallannartaqaaq sumiiffimmut iserluni kinaassutsimik isiginiarfiunngitsumut. Tamanna nuannersorujussuuvoq, qularnanngilluinnarporlu tamanna Kalaallit Nunaannut nassarsinnaagiga, tassanilu immikkoortoqarfinnut ingerlateqqillugu, Nivé Heilmann oqarpoq.

Illoqarfiit arfinillit

Illoqarfinni katillugit arfinilinni ikiuuttassaaq. Arnarlu kisimiilluni suliniut annertorpasikkaluartoq misigisimavoq iliuuseqarnini nikisitsisinnaassasoq.

– Aap, taamatut misigisimavunga. Tassami Kalaallit Nunaanni Blå Korsit peqatigalugit ingerlatsiniartussaavunga, peqatigiiffiullu ilaasortaasa illoqarfinni taakkunani innuttaasut naapittartussaavaat. Taamaattumik kisimiittutut misigisimanngilanga, Nivé Heilmann oqarpoq.

Meeqqat atuarfianni ilinniartitsisoq

Nivé Heilmann meeqqat atuarfianni ilinniartitsisutut ilinniarsimasoq siusinnerusukkullu MIBB-mi, Meeqqat Inuunerissut, meeqqat pitsaanerusumik atugassaqalernissaannik suliniutilimmi, sulisimalluni.

Pitsaanerulersimavoq

Taanna Nuummi najugaqarpoq, misigisimavorlu nunatsinni meeqqat inuusuttullu suli annertunerujussuarmik sullinniarneqarsinnaasut, akuersaarpaalu tamakkua atugaat pitsaanerulersimasut.

– Ajornartorsiutit ilisimasimavagut, uparuarnissaannulli pikkorippallaarsimanngilagut. Ukiunili kingullerni qulini isumaginninnikkut ajornartorsiutivut arajutsisaanneqarnerulersimapput, unammilligassallu sammineqalersimallutik, taanna oqarpoq.

Meeqqat ukiuat

2012-imi Kalaallit Nunaat meeqqanut illersuisortaarpoq, 2016-ilu meeqqat ukiuatuttut suaarutigineqarpoq, ukiormannalu nunatsinni meeqqat inuunerat sammineqarnerulissaaq.

/ritzau/

Powered by Labrador CMS