Inatsit tunngaviusoq

Tunngaviusumik inatsisissamut isumalioqatigiissitamut amerlanerussuteqartut

Inatsimmut tunngaviusussamut Naalakkersuisut pilersitsinissaannut Demokraatit kisiartaallutik akerliupput

Inatsisartut oqaluttuarisaanermut ilannguttussamik ullumi ataatsimiipput.

Namminersulernissamut inatsit tunngaviusussaq Inatsisartuni ilaasortat amerlanerussuteqartut ataatsimiinnerup takutippaa. Partiinilu kisiartaallutik akerliupput Demikraatit. Taakkumi inatsisissatut siunnersuutigineqartoq ulluni marluinnarni suliarineqarnissaa akisussaaffimmik qimarratiginninnertut nalilerpaat.

Atuaruk: - Ulloq pingaarutilik

Ataasinngorpat taasissutigineqassaaq

Siumut, Partii Naleraq, Inuit Ataqatigiit, Atassut attaviitsullu Per Rosing-Petersenip siunnersuut siullermeerneqarnerani taperserpaat.

Ataasinngorpallu inatsisissaq taasissutigineqaruni akuerineqassappat Naalakkersuisut inatsimmut tunngaviusussamut ataatsimiititaliorsinnaalissapput tassannga suliarinnittussanik.

Atuaruk: Tunngaviusumik inatsisiliornissamut ataatsimiititaliaq Inatsisartunit suliaripallanneqartoq

Kielsen attortisimavoq

Amerlanerussuteqartunut persuarsiorfiuvoq Nunarpummi namminersulivinnissamut aalloriarneq pingaarutilik akuersissutigineqassammat.

- Killiffipput attortisimassutigaara, naalakkersuisut siulittasuat Kim Kielsen (S) oqarpoq.

Atuaruk: Takussutissaq: Isumalioqatigiissitap suleriusissaa aana

Ataatsimiititaliaagallartussaq

Inatsimmut tunngaviusussamik ataatsimiititaliortoqarallassasoq partiit tamarmik ilaasortaatitaqarfigisaannik tapersersorneqarpoq. Ataatsimiititaliammi inatsit tunngaviusussaq ilusilersorlugulu aaqqissuuttussaavaa.

Atuaruk: Inatsimmut tunngaviusussamut nalunaajaammik nutaamik IA perusuppoq

IA nalunaajaammik nutaamik perusuppoq

Inuit Ataqatigiilli inatsimmut tunngaviusussamut tunaartarineqartoq naammaginartinngilaa.
- Nalunaajaammik nutaamik upernaakkut ataatsimiinnissamut sanasoqarnissaa kissaatigaarput, partiip oqaaseqartartua Kelly Berthelsen oqarpoq.

Partiimmi nalunaajaammi siunnersuutigineqartoq, tassa inatsit tunngaviusoq danskit inatsisaannit aallaaveqarnissaa, isumaqatiginngilaat.
- Inatsimmik tunngaviusumik Nunatsinnut atuuttussamik suliaqarnermi inatsisit tunngaviusut qangaaneersut Nunatsinnullu tulluanngitsut aallaavigineqassasut siunertaqanngissoraarput, Kelly Berthelsen (IA) oqarpoq.

Atuaruk: Namminersulernissamut aqqutissat arlallit

D sukkaannaq sulineq isornartorsiorpaa

Inatsit tunngaviusoq sooq taama piffissami sivikitsigisumi suliniarineqarnersoq Demokraatit paasisinnaanngilaat. Quppernerimmi 100-t ippassaq aatsaat Inatsisartunut agguaanneqartut partiip oqaaseqartartuata Micheal Rosingip isornartorsirpaa.

- Namminiilivinnissaq ukiorpassuit qaangiuppata aatsaat piviusunngorsinnaavoq. Taamaattoq Naalakkersuisut soraalernitsinni tuavisukannersumik suliaq agguaappaat. Tamanna uggornarlunilu toqqissisimananngilaq eqqarsarluarnerunanilu. Nunattalu inatsisiliortuinut ataqqinninnginneruallaarluni, Michael Rosing (D) oqaaseqarnermini ilaatigut oqarpoq.
Kikkut tamarmik peqataatinneqarlik

Inuiaqatigiinni taasisinnaasut tamarmik ilanngunneqassasut naalakkersuisuip Suka K. Frederiksenip (S) oqaaseqaatimi oqaatigaa. Utaqqinissarli piffissaqarfiginngikkipput isumaqarpoq.

- Namminersulivinnissamut alloriartariaqalerpugut, naggasiinermini taanna oqarpoq.

Powered by Labrador CMS