Torskefiskeri
Tunisinerup unitsinneratigut tunisassiorneq kalluarneqarpoq
Tunisinerilli unitsinneqarnerini aalisartut aningaasanik annaasaqarnersaasarput, Royal Greenlandip suliffissuani pisortaq oqarpoq
Qaammatip aappaata affaani saarullinnik tunisinerup marloriarluni unitsinneqartarneri Royal Greenlandip sineriammi tunisassiorfiini ingerlaavartumik tunisassiornerannut kalluaavoq. Maniitsumi tunisassiorfimmi sulisut aqqaneq marluk angerlartiinnarneqarsimapput Qeqertarsuarmilu sulisut arfinillit tunisassiorfiup iluani sulianik allanik suliassinneqarsimallutik. Tamanna atuarneqarsinnaavoq Royal Greenlandip nittartagaani allaaserisami.
Saarullinnik tunisinerup unitsinneqaqattaarnerata ingerlaavartumik tunisassiorneq kalluarmagu kipiluttunaqaaq. Naak sulisunik soraarsitsisoqanngikkaluartoq, taamaattoq novembarip 19-ianiit 27-iata tungaanut tunisinerup unitsinneqarnerani tunisassiarineqarsinnaasut tonsit aqqaneq marluk annaavavut, Qeqertarsuarmi tunisassiorfimmi ingerlatsisoq Emil Mølgård taama oqarpoq.
Maniitsumi tunisassiorfimmi piffissami novembarip 19-ianiit 27-ianut sulisut 60-it 80-illu amerlassuseqartut akornanni sulisut aqqaneq marluk angerlartiinnarneqartariaqarsimapput.
– Suulisut aqqaneq marluk angerlartiinnartariaqarsimavavut. Tunisinerup unitsinneqartarneratigut sulsisut sulilluartut ilaat tunisinerup ammaqqinnerani suliartoqqinneq ajorput allamik suliffissarsiortaramik. Taamaalilluta tunisinerup unitsinneqartarneratigut ajoraluartumik sulisut sulilluartut annaasarpavut, Maniitsumi tunisassiorfiup ingerlatsisua Pele Nathansen oqarpoq.
Aalisartut annaasaqarnerpaapput
Tunisassiorfiilli ingerlatsisui oqarput saarullinnik tunisinerup unitsinneqartarneratigut aalisartut annaasaqarnerpaasut.
– Aalisartut umiatsiaararsortut 30 - it missingi aammalu aalisariutit sisamat tunisassiorfimmut tunisisartut katillutik sapaatip akunneranut 80 tonsit missingi tunisarpaat, taamaattumik tunisinerup unitsinneqartarneratigut aalisartut eqqorneqarnerpaasarput, Pele Nathansen oqarpoq.
– Maannakkut imartatsinnni saarulleqaqaaq taamaattumillu saarulliit tonsip aqqaneq marluk missingi sapaatip akunneranut tunisassiorfimmut tunineqartarput. Taamaattumik tunisineq unikkaangat aalisartut aningaasatigut annaasaqangaatsiartarput, kisianni aamma uagut tunisassiatigut annaasaqartarpugut, Emil Mølgård oqarpoq nangillunilu:
– Saarulliit "tikeraartunik " taasartakkavut, tassalu ukiut ilaanni saarulleqarujussuartarnerata atorluarneqannginnera uggornaqaaq. Taamatummi tikeraartunik saarulleqartarnera ukiut tamaasa pineq ajortoq, ukioq manna pivoq.
Qeqertarsuarmi tunisassiorfimmi sulisut arfinillit ulluni makkunani saarulliit tonsit pingasut ullormut tunisassiarisarpaat.
2014-mi saarullittassat 15.000 tonsiusut oktoberimi pisarineqareermata tunisineq matuneqarpoq. Kingorna novembarip aappaani pisassiissutit 1.500 tonsiusut nungummata novembarip 19-ianiit 27-iata tungaanut saarullinik tunisineq uninngatinneqareersoq novembarip 27-iani pisassat 2.000 tonsinik ilaneqarput.
Aalisarsinnaanermut Akuersissutinik Nakkutilliisoqarfiup kisitsisaatai naapertorlugit saarullittassat novembarip 27-iani 2.000 –iusut tunniunneqartunit 900 tons decemberip aallaqqaataani pisarineqareersimapput, Royal Greenlandip nittartagaani allaaserisami, Inga Egedemit allanneqarsimasumi, allassimavoq.