Tunisassiornerup matoqqanerani sulisut pikkorissartinneqartut

Maniitsumi tunisassiorfik decemberip 15-iani tunisassiorunnaarallartoq januarip 23-iani tunisassioqqilissaaq.

Qaleraliit tunisassiassat uninngasuutit marsip 31-iata tungaanut tunisassiorsinnaajumallugit juulleriartornerani juullillu kingorna tunisassiornitta unitsikkallarnissaa toqqarsimavarput.

- Kingusinnerusukkut qaammatini marlunni tunisassiorfiup matoqqasariaqalernissaa pinngitsoorumallugu juulleriartorneraniit januarip 23-iata tungaanut matoqqaniarluta toqqarparput, Maniitsumi Royal Greenlandip tunisassiorfiani ingerlatsisoq Susanne Marie Knudsen Royal Greenlandip nutaarsiassaqartitsivianut oqarpoq.

Pikkorissarnerit amerlanerusut

Tunisassiorfiup matoqqagallarnerani sulisut 75-it tunisassiornermut pikkorissartinneqassapput sulisullu allat qulit eqqiluisaarnermut una sapaatip akunnera tullianilu pikkorissartinneqassasut taassuma oqaatigaa.

Sulisut decemberip 15-iani suliunnaarallartinneqartut 117-iusut ilaat 75-it sapaatip akunnera una sapaatillu akunnarani tullermi tunisassiornermi periutsit assigiinngitsut soorlu tunisassianik nammineq nakkutillliinermut tunngasut, eqqiaanermut tunngasut, tunisassiat sunerinik ilisimasaqarnermut tunngasut, tunisassiornermi ilitsersuinermut aammalu tisasarnermut tunngasunik pikkorissartinneqassapput. Sulisut allat qulit ullup affaanik sivisussuseqartumik eqqiaanermut tunngasunik pikkorissartinneqassapput. Sulisut 75-it eqimattanut pingasunut avillugit ulluni pingasuni pikkorissartinneqassapput.

Sulisut pikkorissartinneqarnerat Royal Greenlandimi Sulisoqarnermi Pikkorissarnermilu Imikoortortaqarfimmi sulisut aammalu Inuussutissalerinermi Ilinniarfiup Inuilip sulisuinit ingerlanneqassaaq.