Tunisassiorfimmi sulinermi misissuinerup Royal Greenlandimi sulisut aalajaallisissavai

Sooruna Royal Greenlandip tunisassiorfiini sulisut tallimararterutaat suliffimmut aggernissamik ajornartorsiortartut?

Taanna apeqqut suliffeqarfiup annertuumik misissuinikkut akissuteqarfiginiarsariniarpaa, Royal Greenland nittartakkamini taama ilisimatitsivoq.

Antropologit
Sisimiuni tunisassiorfik siullermik tassani misissorneqassaaq, taassumalu kingorna annertunerusumik misissuisoqassaaq, tunisassiorfiit arlallit aamma suliffeqarfiit allat ilanngunneqassallutik.

Misissuinermut atatillugu qallunaat suliffeqarfiutaat Antropologerne ApS sulisussanngortinneqarput.

Sulisartut kattuffiat SIK ilaasortami soqutigisaat aallukkusullugit suleqatigiinnermut peqataavoq. Taannalu kattuffik Kanukoka peqatigalugu misissuinermut tapersiiniarlutik aningaasaleeqataapput.

Ukioq kaajallallugu sulineq
Sulinermi pissutsit pillugit misissuinissami pingaarnertut sulisunik amerlanernik ukioq kaajallallugu sulisoqalernissaq qulaajaavigineqassaaq, pingaartumillu tunisassiorfinni ulapaarfiup nalaani aalajaatsunik sulisussaaleqisarneq sammineqassaaq, tamatumanilu paasissutissanik aaqqiissutissatut ineriartortitassanik katersisoqassaaq.

- Tunisassiorfitsinni aalajaatsunik sulisoqarnerulernissarput kissaatigaarput, sapinngisamik najukkamit sulisoqarnikkut imaluunniit Kalaallit Nunaata sinneraneersunik sulisoqarnikkut. Nunatsinneersunilli sulisoqarsinnaaneq angusinnaanngikkutsigu periarfissat kingullersaattut sulisussanik nunatta avataanit tikisitsisariaqarpugut, Attaveqarnermut Sulisoqarnermullu Pisortaq Jens K. Lyberth misissuisitsinissamik isumassarsisuusoq oqarpoq.

Pisortap erseqqissarpaa tunisassiorfinni sulisut 80 procentii aalajaatsuummata aammalu 20 procentit sinneruttut aalajaatsuunnginnerannut peqqutaasinnaasut qulaajarlugit misissuivigineqassasut.