peqataatitsineq
Tumit - peqataatitsiniarluni suliniuteqarneq
Kalaallit Illuat Odense Kommunilu suleqatigalugit, Danmarkimut nooqqammersut ulluinnarni inuuniarnikkut oqilisaaffiginiarlugit nutaamik neqerooruteqartoqarpoq.
Kalaallit ukiuni pingasut iluanni Danmarkimut nuussimasunut neqeroorutaavoq. Tumit Kalaallit Illuata neqeroorutigeriingaannut peqataatitsiniarnermi taartissatut siunertaavoq.
Ataavartumik tigusisarneq
Suliniummi peqataasut qaammatit arfinillit tikillugit peqataasinnaapput. Inuuniarnikkut peqataalersinnaasutut misigingaanni unittoqartarpoq. Anne-Mette Harvig Hansen suliniummi ataqatigiissaarisuuvoq, Alex N. Andersinilu nutserisuulluni. Suliniummi Odense Kommunimeersumik aalajangersimasumik sullissisoqarput. Peqataasut holdimi arfineq pingasuusinnaapput, taakkuli marlunngornerit tamaasa naapeqatigiittarput, ataavartumillu peqataarusuttunik tigusisoqarsinnaalluni.
Aaqqitassarpassuit
Odense Kommuni angisoorujuuvoq. Danmarkimut nooqqammisuugaanni allaffinnut attaveqarniarneq nalornissutaasinnaasarpoq, atortorussaarutillu digitaliusut aammattaaq unammillernarsinnaarlutik: E-Boks, Jobnet, skat eqqaaneqarsinnaasut ilamininnguaraat. Aaqqitassallu tamaasa aaqqissimanngikkaanni pillaatiginninnermik kinguneqaratarsinnaasarlutik. Tamatumalu kingunerisarpaa ikiorsissuutit pisassaraluit ikilisinneqartarnerat.
Nooqqammisuulluni ikiorneqarnissaq pisariaqartoq ataqatigiissaarisup Anne-Mette Hartvig Hansenip nalornissutiginngilaa. Tumimi peqataaneq attaveqaatinik pisariaqarluinnartunik pilersitsisarpoq.
Artornartoq
Nunatsinniik Danmarkimut artornarsinnaavoq, Tumimi peqataasut arlallit Sermitsiaq.AG-mik oqaloqateqarnerminni isertuunnagu oqaatigaat. Manasse Noahsen 19-nik ukiulik oqaluttuarpoq:
- Ukiut marluk matuma siorna Danmarkimut tikippunga. Najugaqarniarnikku ajornartorsiutit pissutaallutik ikiorneqartussat inaanni piffissap ilaani najugaqartariaqarsimavunga. Massakkulli qujanartumik ineqalernikuuvunga. Ikiorneqartussat inaannit Tumillu ikiorsimavaannga.
- Nunatsinni uterlunga marine- snescootermekanikeritut ilinniagaqassarusullunga, danskit oqaasii ilikkarluarusuppakka, Manasse Noahsen neriulluarluni naggasiivoq.
Har det godt i Grønland
Edel Lynge ukioq ataaseq Danmarkimiissimavoq. Misiginikuusat eqqaallugit piffisap ingerlanerani qujanartumik quinartunngortarput. Assersuutigalu Københavnimut kinguaattorluni angalanermi Aalborgimulli ingerlaqqittussaalluni, Edel Lyngellu timmisartoq Aalborgimukartussaq angumerinngitsoorsimavaa. Danskit oqaasii iluamik atorluarsinnaanngikkaanni qimutsuitsunut billetsiniarneq imaasiallaannaq pisiarineq ajornarpoq.
- Edel Lynge oqarneratut nunarsuarmi kisimiittutut misinnarsinnaasarpoq, Edel Lyngellu qularutiginagu oqarpoq:
Siunnersuut pitsak
- Aallaqqaammut pissaganarpoq, piffissallu ingerlanerani oqimaalliartortarpoq. Nunatsinneersulli Danmarkimut nuunniarlutik eqqarsaatersortunut siunnersuutigisinnaavara eqqarsaatigilluaqqaassagaat. Danmarkimimi inuuniarneq artornarsinnaasarpoq. Edel Lyngep oqaloqatiginerani ersarissumik naggasiilluni ima oqarpoq:
- Nunatsinni innuttaasut qanoq atugarissaartiginerlutik naluaat.