Oqaatsit

Tuluit oqaasiinik tuaviupiluussilluni pilersaarummut IMAK aarlerisaarivoq

Ilinniartitsisut kattuffiata tuluit oqaasiisa allamiut oqaasiini salliutinneqarniarnerannut piffissaliussaq tupigusuutigaa

Nivi Olsen
Ilinniartitaanermut naalakkersuisoq Nivi Olsen (D)

Meeqqat atuarfianni tuluit oqaasii allamiut oqaasiini siullertut atuartitsissutigineqartalernissaannut, ilinniarnermut naalakkersuisup Nivi Olsenip (D) ulluleereersimanera, meeqqat atuarfiini ilinniartitsisut kattuffiata IMAK-ip tupigusuutigaa. Tamanna IMAK-ip siulittaasuata Karl Frederik Danielsenip nalunaarutaani atuarneqarsinnaavoq.

Atuaruk: Nivi: Tuluttoornerup utaqqisinnissaanut akissaqanngilagut

Oqaloqatigiinnissamik pisariaqartitsisoq
Apeqquteqaat aallavigalugu oqallisissiatut siunnersuummi Vivian Motzfeldtip (S) saqqummiussaani, tamanna aggustimi 2018-imi pissasoq Nivi Olsen (D) akissuteqaammi allappoq.

Meeqqat atuarfianik soqutigisaqartut suli oqaloqatiginagit Nivi Olsenip ulluliinera, IMAK-ip tupigusuutigaa.

Atuaruk: Tillie: Tuluttoorneq utaqqisilli

Atuartitsissutitut imaluunniit oqaatsit takornartat
Kisianni tamatuma saniatigut, Nivi Olsenip isummat marluk akulerukkai IMAK isumaqarpoq, tassa tuluit oqaasii atuartitsinermi oqaatsitut aamma takornartat oqaasiini siullertut taaneqarmata.

- Atuartitsinermi oqaatsitut atuinermiit allamiut oqaasiisut siulliunneqarnermut assigiinngissut annertoorujussuuvoq, IMAK-ip siulittaasua Karl Frederik Danielsen nalunaarummini allappoq.

Atuaruk: Atassut: Tuluit oqaasiinik pilersaarut kukkunerusinnaavoq akisooq

- Atuartitsinermi oqaaseq tassaavoq atuartitsinermi atorneqartartoq. Tassa imaappoq, atuartitsinermi oqaaseq, assersuutigalugu matematikkimi, inuiaqatigiilerinermi, fysikkimi il.il. taanna oqaaseq atorlugu atuartitsineq ingerlanneqassasoq.

Atuartut qallunaatut oqaaseqartut
Tuluit oqaasiisa qallunaatut oqaatsit atuartitsinermi atorneqalerlutik taarsissappatigit, IMAK-ip aamma atuartut qallunaatut oqaaseqartut qanoq inissisimanissaat apeqquserpaa.

- IMAK-ip siulersuisuisa ilimaginngilaat, siunnersuuteqartut Naalakkersuisulluunniit meeqqanik Kalaallit Nunaanni inuusimasunik, ilitsoqqussaralugulu kalaallisut oqaaseqanngitsunik, pillaanissamik siunertaqarsimassasut, nalunngisarpummi naapertorlugu meeqqat namminneq qinigarinngilaat kikkunnit pinngornerlutik, sumi sumillu ilitsoqqussaralugu oqaaseqarnerlutik, Karl Frederik Danielsen IMAK-imi siulersuisut sinnerlugit allappoq.

Atuaruk: Ineqi: Tuluttoorneq qallunaatoornermit amerlanerusunik periarfissaqartitsivoq

Powered by Labrador CMS