Tuluit nakorsat sikaritsit-lightit mianersoqqussutigigaat

Sikaritsit lightitut akuutissakitsutullu tuniniarneqarneranni pilerisaarutigineqartartut, puakkut kræftimik nappaatillit amerliartornerinut peqquteqarsinnaavoq.

BBC aallaavigalugu, tuluit peqqinnissamut oqartussaasui taama mianersoqqussuteqarput.

Tuluit naalakkersuisuisa peqqinnissamut ilisimatuuata professori, Liam Donaldsonip, lightinik tjærinillu akukitsunik taaguisarnerit, sikaritsit taama ittut navianannginnerusutut paasineqarsinnaammata paatsuunganarsinnaanerarpai.

Taassuma taaguutit taakku allanngortinneqapallattariaqarneri, tuluit naalakkersuisuisa peqqinnissamut ataatsimiititaliaanut oqaatigaa.

- Sikaritsimik naviananngitsumik peqanngilaq. Tamanna misissorneqarluartariaqarpoq. Tjærimik akuutissakitsunik sikaritsisisartut amerliartorput, taamaalilluni kræftimik pilersitsisinnaasut akuutissallu allat puakkut kræfteqarfiulersartumiilersarput, Donaldson oqarpoq.

Paul Lincolnip tuluit peqqinnissamut oqartussaasuisa paasissutissiisarfianeersup naalakkersuisunut ilisimatusarneq pujortartartut 77 procentiisa sikaritsit nalinginnaasut atorunnaarlugit lightit navianannginnerusoralugit pujortartalersimagaat paasineqarsimasoq innersuussutigaa.

Lincolnip peqqinnissamut oqartussat 1980-ikkut qeqqaniilli politikkikkut unioqqutitsisimanerarpaat, tassanimi naalagaaffimmit oqaatigineqartarsimavoq, pujortassaarsinnaanngikkaanni sikaritsinik lightinik tjærinik akuutissakitsunik atuisoqalertariaqartoq.

- Ullumikkut inuit pujortassaaveqqusarpagut, taanna oqarpoq.

Dawn Milnerip tuluit peqqinnissamut ministereqarfianeersup sikaritsinik "isumannaannernik" pilersitsiniarneq aallutiinnartariaqarnerarpaa.

- Soorunami sikaritsit tamarmik navianartorujussuupput. Pujortartartuerunnissaa tamatta kissaatigaarput. Taamali unitsitsisinnaajunnaarsimasut amerlatigitillugit sikaritsinik isumannaannerusunik pilersitsiniartariaqarnerupugut?

Nakorsap Mick Peakep Pontefracts Hospitalimeersup oqaatigaa – tupat tjærimik akuutissakitsut kræftimik tinunermik pilersitsisinnaalluartut.

- Millunnerugaanni puami appasinnerusumi immaqa tinunermik navianartumik pilersitsisinnaavoq, taanna oqarpoq.

/ritzau/